Presidente di Sindicato di Polis:
ORANJESTAD (AAN): Rodney Solognier, Presidente di Sindicato di Polis (SPA) a indica den un entrevista recien cu busca mas miembro pa Cuerpo Policial ta keda un punto dificil.
El a splica cu mester busca calidad, pasobra no por yega busca cantidad ya cu cosnan por bay robes. Toch ta riba dje y pa cu esaki tabata tin un reunion e siman aki cu Alto Comisario, a bisa.
Solognier a agrega cu tambe nan a haci un calculacion y tin un deficit di 200 polis pa e per capita di Aruba. A sigui bisa cu a haya ayudo di cierto departamentonan, pero si haya e cooperacion di tur lo yega leu.
Tin hopi protocol entre tur departamento y esey ta haci cu e cosnan ta stagna un tiki. Ta spera cu den futuro e protocolnan por wordo suavisa pa por tin un mihor cooperacion y pa por trece un mihor funcionamento den KPA, e presidente di SPA a duna di conoce.
