Accion rapido di Polis na Tarabana y a descubri Hyundai horta na un cas

Un biaha mas na Mandolinstraat

ORANJESTAD (AAN): A base di un tip balioso, autoridadnan hudicial a dicidi na actua prudentemente riba e informe, y cu bendicion di Ministerio Publico a tene un tipo di razzia na un cas den Mandolinstraat na Tarabana.  E caya aki ultimo lunanan ta basta den noticia.

    Un cas bon conoci pa husticia, diripiente a worde rondona pa Polis den tur skina.  Y e accion aki ta debi cu a haya informacion cu tin un auto horta scondi parti patras di e cas.

   Pa ningun hende por huy, diferente unidad di Polis a presenta inespera, y esaki a inclui diferente unidad motoriza.  Nan a logra seya e tereno na forma perfecto, y asina a bay check paden.

   Polis no mester a ni usa forza pa drenta e cas, debi cu cu por bisa ta practicamente full habri e cas ta.  Y riba e tereno enberdad a bin topa cu un Hyundai color cora scondi.  Sigui cu e buskeda, nan a bin topa tambe cu dos mata di cannabis ta creciendo den potchi.  A bin haya tambe loke ta wordo considera resto di un Scooter cu a keda desarma.

   Pero e situacion no a bay asina facil, como cu un persona masculino eynan a dicidi na protesta loke ta pasando, y no kier a razona pues no tabata sigui ordo di Polis.  Aki mesora a pasa pa detene.

   Sinembargo el a resisti contra su detencion, y ta varios agente a bin pone forza riba dje pa porfin haya su mannan den boei, y di e forma ey a domin’e.  El a keda deteni y hiba Warda di Polis.

   Awor ta investigando e Hyundai haya eynan, y tambe lo check e piezanan di motorcycle cu a ser haya.  E dos potchi di mata di cannabis a wordo confisca.