Relaciona cu 4 curpa haya na December na costa
- Investigacion cu a dura ya mas di 5 luna
- Nomber ni nacionalidad no a wordo suministra
ORANJESTAD (AAN): Tabata riba un Dialuna marduga, esta 11 di December aña pasa, algo prome cu 3:00 am, cu autoridadnan di Aruba a confronta un situacion dramatico na Vader Piet, unda informacion a drenta cu un grupo di persona indocumenta cu a logra subi tera den e area. Dos persona cu si a landa y yega tera, a cana door di Parke Arikok te cu a yega un cas, y aki a bati alarma bisando cu e lancha a kapseis cerca di Aruba y cu lo por tin victima. E dianan ey lama tabata basta bruto.
Wardacosta a reacciona rapidamente, mobilisando unidadnan di tera pa inspecciona e area. Na yegada na e lugar, unda e agentenan di Wardacosta a enfoca nan esfuersonan di buskeda riba e panort di Aruba, nan a detecta cu dos curpa sin bida tabata drief den lama. Cuerpo Policial di Aruba, apoyando e esfuerzonan di Wardacosta, a usa nan helicopter pa obtene un bista amplio di e area, mientras unidadnan na tera den un esfuerso continuo pa localisa mas posibel victima.
Lamentablemente, durante e buskeda, nan a descubri un otro curpa sin bida, aumentando e cantidad na tres persona sin bida. Pero despues a perde e curpa fo’i bista, posiblemente pega bao di barancanan den lama bruto.
Poco prome cu solo a baha, Helicopter di Wardacosta a bin topa back cu e 3er victima aki, y nan a baha cu cabuya y sake for di lama. Na final, ta un total di 4 curpa a ser haya morto.
Detencion a cay awor na Mei: For di e dia ey, autoridad hudicial na Aruba a sigui cu investigacion, y cinco luna despues a bin haya sa cu detencion a cay relaciona cu e caso aki.
Unit mensenhandel en mensensmokkel (UMM) di Cuerpo Policial di Aruba a detene un homber riba Dialuna mainta relaciona cu e investigacion penal di un sucedido cu a tuma lugar na december ultimo caminda 4 persona a perde nan bida.
E sospecho ta cu e personanan aki a purba drenta Aruba ilegelmente via boto. Relaciona cu esaki UMM a cuminza un investigacion penal di e hendenan posiblemente envolvi den e caso di traficacion humano aki.
Vocero Ann Angela di Ministerio Publico, a divulga cu e persona deteni Dialuna mainta, ta wordo sospecha di a yuda den e viahe di contrabando den anochi di 10 pa 11 di December 2023. E investigacion ta sigui y mas detencion no ta wordo exclui.
