Accident pisa ora motorcycle a dal y kibra palo di luz

Manehador a keda grave herida

ORANJESTAD (AAN): Tabata Diabierna mainta cu Central di Polis a dirigi patruya di Noord cu urgencia riba Caya Musica, como cu como 200 meter pazuid di e rotonde chikito di Bubali, un accident basta serio a caba di socede.

   E prome unidad di Polis cu a yega, a bin nota cu un Honda Motorcycle color cora a dal violentamente den un palo di luz.  Esaki ta pabao di caminda net mey-mey di adres Caya di Musica 33 y 31.

   Debi na e impacto aki, e manehador di e Honda aki cu extended swingarm patras, a bay cay mal herida den cura di cas #31.

   Polis a mira e situacion di e manehador, y mesora a pidi pa Ambulans yega cu mas urgencia.  Y mesora a traha pa conserva tur rastro cu tin riba caminda, como cu ta mustra cu e Honda Motorcycle grandi aki tabata bayendo zuid, y diripiente a baha di caminda, dal e palo di luz kibra.

   Ambulans a yega rapido, y mesora Paramediconan a bay pa stabilisa e victima.  Tin indicacion cu el a haya fractura complica na su pia, y tambe lo a kibra algun ribchi y esey ta ocasiona dolor inmenso.

   Polis di Trafico tambe a yega pa investiga e accident, y mirando e gravedad di e desgracia aki, a pidi e team forensico di BFTO pa nan tambe presenta.  E palo di luz cu a kibra tin varios kabel ‘feeder’ riba dje, y esey a bay dura basta pa drecha esaki.  Pesey e area direct eybanda a keda sin coriente, mientras cu Elmar a haci reparacion.

   Cu urgencia ambulans a transporta e manehador herida pa Hospital.