Caso di December dilanti Tio Pepe
- E hoben victima di 17 aña a keda invalido
- Recherche San Nicolas investigando pa 5 luna caba
ORANJESTAD (AAN): Autoridadnan hudicial no a para keto den e investigacion di caso serio di tiramento cu a socede aña pasa na Pos Chiquito. Tabata Diasabra 16 di December 2023 den oranan di marduga, cu un conflicto cu a presenta su mes den Betonicastraat, y diripiente esaki a escala di tal forma cu tiramento a start.
Esaki a socede net dilanti di Tio Pepe Bar & Restaurant cu e momento ey tabata cera. E tiramento y buya aki a pone cu bisiñanan a core yama y bati alarma na Polis.
Central di Polis a ricibi e prome yamada pa 2:58 am, y inmediatamente a manda unidad di Polis di San Nicolas pa bay check posible caso di tiramento den e area. Diferente otro unidad di Polis a cuminsa move pa e lugar tambe.
E prome unidad di Polis cu a yega eynan, a bin haya e area full bashi y abandona. E oficialnan a topa cu ningun persona. Nan a saca nan flashlight y a cuminsa check si acaso por haya huls benta abao. Personal di Ambulans tambe a yega, pero no por a haci nada como cu tin nada di victima.
Cu nan flashlight y listrando meticulosamente, e agentenan rapidamente a bin haya varios huls abao riba Betonicastraat. Mesora Polisnan a saca varios cono di plastico pa pone riba nan, pa proteha nan te ora cu team forensico di BFTO yega pa documenta tur cos. Nan a check tambe den Malohistraat pa mira si por tin huls benta abao.
Recherche di San Nicolas tambe a yega pa cuminsa investiga. Net dilanti di Tio Pepe Bar & Restaurant a bin haya un auto compacto Mini Cooper color cora cu dak blanco, cu ta destrui. Aki tambe a seya e area di e auto pa asina por haci investigacion.
Hoben di 17 aña a ricibi bala: Un rato despues, Servicio di Emergencia di Dr. Horacio Oduber Hospital a notifica Central di Polis, cu personal medico e momento ey ta atende un hoben kende a worde treci eynan, cu un herida di tiro na su curpa.
Mesora Docternan a cuminsa atende, y a core pone Specialista na turno na altura pa e acudi pa asina trata na interveni pa stop sangramento interno.
Vocero di Polis a splica cu ta trata aki di e victima di inicial fam M., y e ta un menor di 17 aña, y e momento ey su situacion ta critico.
DIARIO a compronde cu debi na e tiramento aki, e hoben victima a keda invalido. Esaki a pone cu e caso a bira hopi serio.
Aresto awor na Mei: Departamento di Recherche San Nicolas a sigui haci e trabao di investigacion rond di e tiramento aki, y esaki a bay dilanti poco-poco pero sigur. Nan a traha incansablemente pa pone man riba e sospechoso(nan) den e caso.
Vocero di Polis a confirma, cu na comienso di luna, esta Diasabra 4 di Mei 2024, Recherche ta detene e sospechoso masculino kende ta N.W. di 17 aña di edad. El a indica cu no ta descarta cu lo tin mas detencion den e caso encuestion.
E investigacion ta sigui, y famianan ta exigi pa husticia prevalece den e caso aki unda nan ser keri, un hoben den pleno flor di bida, awor a keda invalido.
Esnan cu ainda tin informacion valioso, por yama y duna esaki na Tipline di Polis na 111-41, y corda cu bo por keda anonimo.
