Accident frontal fuerte a produci tres herido na San Miguel

President di Sindicato SPA a wordo opera mesora

• Tur dos chauffeur a keda pega den e autonan kibra
• Specialista di Trafico hunto cu BFTO ta investigando 

ORANJESTAD (AAN): E impacto di e accident aki a produci un sonido horible.  Inmediatamente personanan di area di Koyari, como tambe San Miguel a cuminsa yama Polis pa informa di un accident cu ta mustra di ta grave a socede pa 11:45 am, riba e caminda di Bubali pa Palm Beach, na altura di San Miguel 30.

   E prome unidad di Polis di Noord cu a yega eynan, a bin topa cu un accident frontal cu a socede net 50 meter pazuid di e cruzada cu tin pa bay Empresa Italo Arubano na Koyari.

   Polisnan a nota cu ta trata aki di un accident entre un sedan Kia Rio color shinishi cu number A-35000, y un sedan Mazda 323 color cora cu number A-75093, y cu tur dos chauffeur ta pega den e autonan.  Mesora a pidi pa manda Ambulans y tambe Vehiculo di Rescate di Cuerpo di Bombero, pa yuda den extraccion di e heridonan.  Tabatin un persona mas herida den e Kia Rio, pero e no a keda pega y a djis keda drumi abao riba suelo kehando di hopi dolor y wardando yegada di personal di rescate.

   En total 3 unidad di Ambulans a yega eynan, fuera 1 unidad di Rapid Responder, y dos unidad di Bombero.   Nan a bin topa cu e accident aki cu ta un dalmento frontal basta violento.

   Mas unidad di Polis a yega pa asina cera e caminda, pa asina personal di rescate por haci nan trabao.  Specialista di Trafico tambe a yega eynan, y a pidi presencia di Team Forensico di BFTO pa bin yuda.  A bin nota cu e chauffeur herida den e Kia Rio, ta e actual president di Sindicato di Polis SPA, esta Sr. Solognier.

   Bomberonan a prepara tur nan equiponan y a pasa despues pa bay corta e parti di e porta robez dilanti di e Kia Rio, pa traha mas espacio pa por saca e president di SPA for di e auto.  Ambos pia di dje tabata pega bao di e dashboard y stuurwiel, y na un forma profesional Bomberonan a corta parti di e porta y ranca e stuurwiel na halto.

   Despues di a keda cla y a saca e president di SPA for di e Kia Rio, Bomberonan a pasa pa corta e otro auto.

   Na e Mazda 323, Bomberonan a usa e cutter hydraulico pa corta e porta patras, corta e asina yama ‘B-Pillar’, pa asina a haya acceso mas facil pa saca e señora sinta tras di stuur.

   E doño di e Mazda 323 a yega na e lugar di accident, y el a splica cu e auto aki a worde fia na un persona, y e persona aki lo a fia e auto na e dama.

   Tanto e president di SPA, y tambe e señora tabata na tino, pero nan situacion tabata basta serio. 

   Cada Ambulans a transporta un herido pa Hospital.  Na Servicio di Emergencia a core yama Specialista, cu algun rato despues a drenta den Sala di Operacion pa opera Sr. Solognier.  Esey ta debi cu e president di SPA mester a wordo opera pa asina stabilisa su condicion.

   E causa exacto di e accident ta bao investigacion, y tabatin varios teoria ta circula na e lugar di accident.  Awor ta keda na specialista di Trafico pa traha su rapport.  Na e victimanan ta bay palabranan di pronto recuperacion.