Sospechoso a wordo haya cu otro arma di candela
ORANJESTAD (AAN): Diamars net un poco prome cu merdia, a base di un investigacion andando relaciona cu un arma di candela cu a wordo haya door di turistanan na Surfside algun siman pasa, y cu a wordo entrega na Polis, y cu a logra haya detaye valioso, a pone cu oficialnan di Atraco Team a subi caya y dirigi nan mes na Pos Chiquito.
Nan tabata enbusca di e hoben na kende e arma aki ta pertenece. Y nan a bin haye di sorpresa na Pos Chiquito.
Na momento cu e oficialnan di Atraco Team a yega, e hoben sospechoso tabata cu un persona sinta den auto. Asina cu el a mira Polis, el a reacciona rapido y a trata di core y huy pa Polis. Pero e oficialnan hudicial tabata mas rapido cune, y nan a logra di gare y detene mesora.
Ora cu nan a bay listra e hoben, e oficialnan a keda sorprendi pa haye cu un arma di candela den su poder! Pues e hoben aki tin acceso asina facil pa haya arma di candela.
Pero pa awor e hoben D.C. ta deteni den cuadro di investigacion di e caso serio aki. E persona cu tabata den e auto, esta e homber J.S. tambe a keda deteni.
Vocero di Polis Liliana Rasmijn a confirma e detencion aki, y el a remarca cu e detencion aki ta e di dos arma di candela den posesion di e sospechoso D.C.
Un biaha mas Atraco Team ta soluciona un caso rapido y ta kita mas arma di candela for di caminda!
Cuerpo Policial ta keda haci un suplica na tur hende cu sa algo of a wak algo, pa yama e tipline di polis 111-41.
