A confisca arma y tambe muts pa comete atraco
ORANJESTAD (AAN): Autoridadnan a sigui investiga e caso di siman pasa ora cu un unidad di Polis a bin mira un Suzuki Swift cora coriendo sin plachi number dilanti den area di Eagle.
Manera DIARIO a relata caba, e Suzuki Swift tabata move na un forma sospechoso y Polis a mira cu tin tres hoben den dje. Polis a dune señal pa stop, pero e hoben a dicidi primi trot y core huy for di agentenan. Polisnan tambe cu sirena y zwaailicht a sigui nan tras, y mesora a notifica mas unidad cu nan ta persiguiendo un auto cu hende sospechoso.
Diripiente e auto a drenta den Ierlandstraat y a lastra brake dilanti un cas. Porta a dal habri y un hoben a ranca careda huy. Pero Polis a keda eynan pa asina detene e persona tras di stuur, kende ta mustra di ta un persona hopi hoben.
Parce cu prome cu e auto a stop eynan, un hende di e auto a hisa man y zwaai un tas cu a cay den cura di cas den Ierlandstraat. Habitante di cas a ripara esaki, y a core yama Polis. Polisnan a yega y den e tas a bin haya un arma di candela.
Ora di a bay listra den e auto Suzuki Swift cu number A-54874, a bin haya tambe e.o. un cuchiu, y varios atributo raro, incluyendo un muts special cu bo ta tapa full bo cara cune, cu ta loke atracadornan sa usa.
Esaki a pone cu Atraco Team a wordo envolvi y a start un investigacion. A base di interogacion y detaye ricibi, nan a detene riba Dialuna e mucha homber cu a core bay for di lugar. E ta di inicial J.R. di 16 aña di edad.
Cu e detencion aki tambe tabata tin dos persona mas envolvi den e caso aki. Den total tres persona ta deteni den e caso di posicion di arma di candela.
Tremendo trabao di Atraco Team cu a soluciona e caso aki lihe.
Cuerpo Policial ta haci un suplica na esnan cu sa algo of a mira algo yama e tiplijn di polis 111-41.
