Fiscal a exigi pa Paul Croes paga 207 mil florin of sino 3 aña di prison

Den caso labamento di placa - *Abogado mr. Illes ta mustra cu Hof ta bisa cu e suma mester ta 183 mil

ORANJESTAD (AAN): Diahuebs 2'or di merdia Corte den Promer Instancia a trata e caso di kita propiedad contra Paul Croes, relaciona cu labamento di placa.

   Den sala di Corte tabata presente Paul Croes cu su señora Melony Croes Paesch, abogado mr. Illes, accountant di Paul Croes, un Hues y un Griffier di Curacao.

   E Hues di Curacao a mustra cu for di documentonan di tratamento di e casonan den Promer Instancia y e sentencia di Corte Superior por compronde cu promer Ministerio Publico tabata papia di 500 mil florin. Ora cu mr. Illes a presenta cu e expertonan accountant cu a mustra cu tabata fayonan den calculacion den e investigacion financiero, e suma a wordo adapta na 240 mil florin. Hues a mustra cu Ministerio Publico a acusa Melony Croes Paesch di a laba 209 mil florin. Hof su decision den e asunto aki ta cu ta declara Melony Croes Paesch liber y cu Paul Croes ta culpable di a laba 183 mil florin.

POSPONE CASO CONTRA MELONY

   Fiscal a bisa Hues pa pospone e caso contra Melony pa tempo indifini pendiente e casacion den Corte Supremo. Hues a puntra cu si Paul ta apela e sentencia si no ta motibo pa pospone e caso. Fiscal ta haya cu no mester. Mr. Illes ta haya cu ta mihor pospone tur e casonan pendiente decision di Corte Supremo, mirando cu Paul Croes a apela e sentencia di Corte Superior. E ta haya cu tin calculacionnan cu lo mester wordo poni un banda y ta kere cu den e decision di Corte Supremo lo tin mas claridad.

PAUL SIN TRABOU FOR DI 2018

Hues a bisa cu e ta bay evalua despues di tratamento di e caso si lo pospone of no. Paul Croes a bisa Hues cu a purba di splica Hof di Corte Superior cu no ta asina cu a laba placa. El a splica cu ta masha trabao y bergonsozo pa bay pidi esnan cu a asisti na nan casamento pa bisa cuanto placa a duna na regalo y mester firma. Segun Paul Croes, tur esaki a haci pa demostra cu no ta labamento di placa. Lamentable Hof ta opina otro. Hues a puntra Paul Croes si e tin trabou. Paul Croes a splica cu for di 2018 e no tin salario mas y no tin trabao. Nan ta huur nan cas y Melony tin negoshi pa asina yega na placa pa mantene famia. El a bisa cu e ta hopi dificil.

FISCAL KIER PAUL PAGA 207 MIL FLORIN

Fiscal a bisa cu den un caso di kitamento di propiedad ta basa riba calculacionnan cu a haci den actividadnan criminal. El a bisa cu e hecho cu awor Paul Croes no tin placa, no ta relevante. Paul Croes a wordo condena den Hof pa entre otro labamento di placa conforme loke Ministerio Publico a demanda. Fiscal a demanda algo mas di 207 mil florin. El a bisa cu si Paul Croes no paga lo tin un castigo di prison maximo di 3 aña.

ABOGADO

Mr. Illes a bisa Hues cu e no ta haya cu por haci demanda contra Melony Croes Paesch. Pa loke ta Paul Croes, mester a haci investigacion grandi pa determina cuanto placa a haya ora di casamento. Hof a pone esaki un banda. E abogado a haci apelacion na Hues pa tuma esakinan na cuenta. E abogado a mustra cu Fiscal ta papia di 207 mil mientras cu Hof ta papia di 183 mil florin. E ta haya cu tin un fayo den calculacion di hof. El a mustra cu Fiscal tabata papia di 16 mil florin den Promer Instancia caminda Hof ta menciona 6 mil. E 10 mil florin aki a keda colga. El a bay coba den e sentencia di Hof pa mustra Hues unda specificamente esaki ta wordo menciona.

Hues a sera tratamento di e caso y a bisa cu dia 2 December 2021 pa 8.15 di mainta lo dicta sentencia. E ora ey lo haya sa si tin decision of si ta pospone e caso pendiente e sentencia di Corte Supremo na Hulanda.