El a opta pa laga Reclassering yuda trece cambia----ORANJESTAD (AAN): Diabierna mainta Hues a dicta sentencia den e caso di un grupo di 5 hoben entre nan un Chines menor di edad cu a haci un serie di asaltonan arma entre Februari 2021 y Maart 2021.
Por a constata cu Hues a tene na cuenta e edad hoben di e grupo y e raportnan di Reclassering cu ta conseha pa guia e hobennan aki pa nan no bolbe haci mesun cos. Door di esey, Hues a dicidi pa duna un castigo abao combina pa asina por pone un periodo di prueba caminda Reclassering lo haya e autoridad pa guia nan.
FISCAL A BAHA PISA RIBA E GRUPO
Na comienzo di October 2021, tratamento di e caso a tuma lugar caminda Fiscal a bisa cu un grupo di hoben a haci 5 asalto arma cu ta hopi serio. Tabatin asalto caminda a usa violencia. Esakinan ta daña imagen di Aruba como destinacion turistico. Fiscal a tuma nan na malo cu durante Corona ta haci esakinan. E asaltonan arma a causa hopi tension y miedo den comunidad. Fiscal a exigi pa R.M. 3 aña y 4 luna di prison di cual 6 luna ta condicional cu 3 aña di prueba. Pa F.T. el a exigi 9 aña di prison. Pa J.R. cu tabata blo desmenti el a exigi 11 aña di prison y pa , J.B. cu a participa den tur e asaltonan arma el a exigi 12 aña di prison.
CASTIGO HUBENIL PA MUCHA
E promer sentencia tabata e mucha L., kende su caso a wordo trata cu portanan sera. Hues a bisa cu e ta haya legalmente proba cu L. a participa den 2 asalto arma y posesion di arma di candela. Pa cu e castigo, Hues a tene na cuenta cu L. hunto cu otronan a haci asalto arma riba 2 snack truck y caminda a usa violencia. A usa arma di candela y cuchio. Hues a bisa cu e asaltonan aki a causa sentimento di miedo y inseguridad den comunidad. Hues a bisa cu e asaltonan arma ta daña e economia y reputacion di Aruba cu ta depende di turismo.
Victimanan di e asalto lo por keda afecta pa tempo largo. Tambe Hues a tene cuenta cu raport di Reclassering cu ta conseha guia intensivo pa evita cu L. lo bolbe haci mesun cos. Hues a bisa cu e ta tene cuenta cu L. a coopera cu e investigacion y a arepenti di loke el a haci. El a bisa cu Fiscal a exigi tambe trabao pa comunidad pero Hues no ta di acuerdo. El a mustra cu segun ley, no por duna trabao pa comunidad si ta duna castigo di prison largo. Hues a condena L. na castigo hubenil di 1 aña di prison di cual 3 luna ta condicional cu 2 aña di prueba y bou guia di Reclassering.
NO CASTIGO HUBENIL PA GRUPO
Pa e grupo J.B.(18), F.T.(18), R.M.(19) y J.R.(25), Hues a bisa cu e ta rechaza e peticion di abogadonan pa duna castigo hubenil na J.B., F.T. y R.M. E ta haya cu no tin suficiente motibo pa haci esaki.
BAHA CASTIGONAN
Hues a ripiti pa tur e grupo cu e cantidad di asaltonan arma a sacudi comunidad y causa sentimento di miedo y inseguridad. Esaki ta tacha e imagen di Aruba como un pais sigur pa cu turismo. E victimanan lo por keda afecta pa tempo largo. Nan a haci tur esakinan pa haya placa sin pensa riba e consecuencianan cu esakinan tin.
Hues a bisa cu a keda legalmente proba cu J.B. a haci 5 asalto arma y posesion di arma di candela, F.T. 3 asalto arma y 1 biaha complice, R.M. 2 biaha complice di asalto arma, J.R. 4 asalto arma y posesion di arma di candela.
Pa J.B. Hues a bisa cu e ta tene cuenta cu e edad hoben y e raport di Reclassering cu ta haya cu mester di guia. Hues a bisa cu e castigo halto cu Fiscal a exigi no ta cuadra cu si kier laga Reclassering guia. Un castigo asina halto ta mustra cu no kier yuda. El a condena J.B. na (48 luna) 4 aña di prison di cual 8 luna ta condicional y 2 aña di prueba y bou guia di Reclassering.
Hues a condena F.T. na 42 luna di prison di cual 6 luna ta condicional, 2 aña di prueba y bou guia di Reclassering.
R.M. a wordo condena na (24 luna) 2 aña di prison di cual 6 luna ta condicional cu 2 aña di prueba y bou guia Reclassering
Pa J.R., Hues a bisa cu e ta tene na cuenta J.R. su comportacion durante e caso. Hues ta haya cu J.R. no a mustra cu e ta arepenti loke el a haci. El a tene cuenta cu e castigo duna na otro sospechosonan y cu e ta hoben (25). Hues a conden’e na 6 aña di prison.
Manera ta conoci, Ministerio Publico tin 2 siman pa dicidi si e ta apela e sentencianan. Tempo lo mustra si e caso aki ta bay Corte Superior of no.
