ORANJESTAD (AAN): Diahuebs Fiscal a duna orden pa Rudy Carti, kende a wordo laga liber despues di a haya su condena, mester entrega su mes na KIA.
Esaki despues cu Fiscal a apela e sentencia di Corte den Promer Instancia. Ta asina cu Hues di Corte den Promer Instancia a declara Rudy Carti liber di 4 di e 8 acusacion di lo a mishi y penetra dama cu e lo a duna masashi.
Hues a condena Rudy Carti na 2 aña di prison di cual 1 aña ta condicional cu un tempo di prueba di 2 aña. Hues a ordena pa Rudy keda sin traha como fisioterapista pa 4 aña. Tambe a ordena pa Rudy paga 7 mil florin di daño na un dama y 2 mil na un otro.
Hues a pone tambe e medida di pago pa si Rudy keda sin paga, e lo mester bay sera. For di ayera mainta, Rudy Carti a entrega su mes na KIA y ta encarcela.
FISCAL A APELA
Den combersacion cu abogado mr. Carlo, el a duna di conoce cu 1 dia promer cu e periodo di 2 siman pa apelacion a pasa, Fiscal a duna di conoce cu e ta apela e sentencia. Ademas Fiscal a duna orden pa Rudy Carti entrega su mes na KIA, pendiente di e caso di apelacion den Corte Superior.
ABOGADO TA CONTRA
E abogado a bisa cu e por a compronde cu na KIA instruccion a wordo duna pa prepara un cel pa Rudy Carti. E abogado a cuminsa un procedura via Hof pa contradeci e decision di Fiscal cu Rudy Carti mester entrega su mes na KIA. Normal ta asina cu si un apelacion sosode, si e sospechoso ta keda encarcela, e ta keda den KIA. Den e caso aki, e periodo di detencion a caba di acuerdo cu e sentencia y pesey a laga Rudy Carti liber. Den diferente caso caminda e sospechoso ta liber, e ta keda den libertad pendiente di e caso.
RUDY A ENTREGA SU MES
Por a compronde cu diahuebs mainta, Rudy Carti a entrega su mes na KIA y a keda encarcela atrobe. Mientrastanto mr. Carlo a cuminsa e caso den Hof y awor ta Hof tin cu tuma un decision si Rudy Carti ta keda liber of mester ta encarcela den KIA.
