Adicto Ambulante a purba kima vehiculo di City Inspector

Caso raro riba Diabierna mainta

ORANJESTAD (AAN): Diabierna mainta na momento cu prensa ta atende e caso den Corte di Gobierno vs. Simar, diripiente bista a cay riba un Adicto Ambulante cu ta canando rond cu tur su ‘pertenencianan’ valioso den un garoshi color cora cu ainda tin e logo di Pricesmart riba dje.

   E momento ey, a nota cu oficialnan di Bureau City Inspector tambe a yega eynan y ta check tur esaki.  Segun esnan di City Inspector, nan sa cu ultimo tempo tin un aumento di cantidad di Adicto Ambulante ta circulando den ciudad.  Y e personanan aki directamente ta responsable pa laga sushi cay unda cu ta.

   E Adictonan Ambulante no ta preocupa cu sushedad, y varios area cu ta kedando sushi ta wordo atribui directamente na loke nan ta yama ‘Actividad di Choller’.

   Esaki por a mira Diabierna mainta tambe, esta cu e Plaza dilanti Palacio di Husticia tabata basta sushi.  Oficina di Bureau City Inspector tabata coriendo cu un Pickup cu tabata coriendo den algun caya ta recogiendo sushi cu e Adictonan Ambulante ta bentando abao.

   Poco despues e Pickup aki tabata moviendo den Dominicanessenstraat a topa cu sushi y potoshi di Adicto Ambulante, incluyendo un frigidaire y aparentemente un Adicto Ambulante no a gusta cu e personal di City Inspector ta recogiendo sushi, ni cu nan kier bay cu su potoshinan.

   E Adicto Ambulante a rabia, y el a converti su mes den Piroman y a cende e sushi den e baki na candela.  E personal di City Inspector a logra di paga e candela na tempo.  Un empleado di Bureau City Inspector a ricibi herida leve den e proceso aki.

   A yama Polis y mesora agentenan a yega y a detene e Adicto Ambulante.  Pasobra awor ta descubri cu e compay aki ta un Piroman tambe.

   Despues di esey e Pickup a yega na e Plaza dilanti Palacio di Husticia y a bay cu tur cu Adictonan Ambulante a laga atras.  Nan a bay cu e garoshi di Pricesmart tambe.  Pues pa e dianan aki e Adicto Ambulante no tin su ‘cos di move’ mas.