Hues a confirma exigencia di Fiscal
ORANJESTAD (AAN): Diabierna mainta via video conference, Hues a dicta sentencia den e caso penal cu Ministerio Publico a cuminsa contra Dylan Andres Delaney (23) kende ta wordo acusa cu riba 7 Juli 2021 a tira mata Marc Mejia Flores. Hues a bisa cu e ta haya Dylan culpable y no ta kere loke Dylan a bisa cu a actua den defensa propio y tampoco cu el a tira un biaha so. Hues a condena Dylan na 12 aña di prison y cu e mester paga un parti di e daño per juicio.
FISCAL
Luna pasa tratamento di e caso aki a tuma lugar caminda Fiscal a bisa Hues cu e ta haya legalmente proba cu Dylan a tira mata Marc. Fiscal a bisa cu durante discusion entre Gio y Marc, a surgi pelea y Dylan a los tiro di cerca. Riba video por mira cu Dylan a tira 2 biaha. Fiscal a bisa cu e no ta kere cu aki por papia di defensa propio. El a bisa cu riba e video di seguridad, cu a pasa den sala di Corte, por a mira cu ta Gio ta dal Marc promer y despues di esey Dylan a tira. E ta haya cu esey tabata un actitud di tof pa tira. Pa cu e castigo, Fiscal a bisa cu e ta tene cuenta cu tabatin mas casonan di tiramento e tempo ey. Dylan a kita bida di un persona di un famia. Fiscal no a mira cu Dylan ta lamenta kico a pasa. El a exigi 12 aña di prison, kitando e tempo cu Dylan ta sera den KIA. Pa loke ta e demanda di daño di 12 mil florin di parti di tata di e victima, Fiscal ta haya cu no a splica esaki. El a pidi Hues pa aproba 5 mil florin pa gastonan di entiero.
SENTENCIA
Hues a bisa cu a keda legalmente proba cu riba 7 Juli 2021, Dylan a tira mata Marc Mejia Flores door di tire den pecho. Tambe Hues ta haya Dylan culpable di posesion di arma di candela. Hues a mustra cu Dylan a nenga di a tira mata. El a bisa cu Dylan a bisa cu ariba e anochi di 6 pa 7 Juli 2021 e tabata papia cu algun hende. Na dado momento un auto a pasa y algun hende a baha entre nan e victima. E victima lo a saca cuchio p’e. Dylan a saca arma y a tira na banda di e victima. Segun Dylan un otro lo a tira e victima. Dylan a tira un biaha so y no dirigi.
NO KERE ACUSADO
Hues a bisa cu e no ta kere loke Dylan a bisa cu ta un otro a tira mata e victima. Ta berdad cu a mira un otro tambe tabatin un arma pero no por a mira cu e persona a tira. Por a mira cu Dylan riba distancia cortico a tira riba e victima. Hues a sigui bisa cu tampoco e no ta kere Dylan cu el a tira na banda y no a dal e victima. Na opinion di Hues, no ta posibel cu ta otro hende a tira riba e victima. Tambe Hues no ta kere loke Dylan a bisa di a tira un biaha. Hues a mustra cu riba e video por a mira claramente cu despues di e promer tiro, Dylan a tira por lo menos 2 biaha. Ademas e dama A. a bisa cu ta Dylan a tira mata e victima. Por a mira riba video cu e dama A. tabata para cerca di Dylan y e victima. Hues a mustra cu A. a bisa cu el a tende un tiro y a mira un flash. El a mira cu e victima a purba core pero no stabil y a tene na un muraya.
NO TA DEFENSA PROPIO
Hues ta rechaza e ponencia cu Dylan a actua den defensa propio. Hues a bisa cu por a mira cu e victima tabata comporta agresivo pero ta parce cu esaki tabata dirigi na otronan y no na Dylan. E bringamento a sosode entre e victima y otro persona y despues Dylan a tira. Hues a sigui bisa cu no por mira riba e video cu e victima tabatin un cuchio den man y a bay riba Dylan. E hecho cu a haya cuchio na e lugar no ta indicacion cu ta e victima tabatin un cuchio den man. Ademas e testigo dama A., tampoco ta bisa cu e victima tabatin un cuchio den man.
12 AÑA DI PRISON
Pa cu e castigo, Hues a bisa cu e ta tene cuenta cu Dylan riba un distancia cortico a tira riba e victima. E bala a perfora e curazon y un ader di e victima. Hues ta haya cu Dylan a kita bida di un persona. A causa hopi dolor na e famia. Hues a tuma na malo cu Dylan no a tuma responsabilidad pa su actonan. Hues a condena Dylan na 12 aña di prison.
Pa loke ta e daño perhuicio, Hues a bisa cu esaki ta complica y lo aproba 4 mil florin. E resto ta declara no admisibel pa asina e famia por cuminsa un caso civil. El a ordena Dylan pa paga 4 mil florin na famia di e victima.
