E medida di 12.6 % ta inhusto
ORANJESTAD (AAN): Diabierna mainta den Corte di Husticia a trata e caso sumario cu Gobierno a cuminsa contra sindicatonan SIMAR y SEPPA. Tratamento di e caso a dura mas cu 2 ora. Den e articulo aki, DIARIO ta publica e punto di bista di e sindicatonan SIMAR y SEPPA y den un otro articulo ta publica e punto di bista di Gobierno. Di e forma aki ta duna lectornan un mihor bista riba e caso.
SIMAR
Abogado mr. D. Kock di SIMAR a bisa Hues cu na Maart 2020 Covid a afecta Aruba. A sera frontera y a perhudica turismo. A surgi crisis y Gobierno a bay busca financiamento na Hulanda. A bisa cu gobernantenan a entrega 20 % y empleadonan di gobierno 12.6 % di nan salario te cu December 2020. Hulanda a bisa cu mester baha gastonan den aparato gubernamental pero segun mr. Kock, no tin e esfuerzo politico. Sindicato a kere cu ta te December 2020. Gobierno a bin cu fase y subsidio di salario pa mehora situacion di crisis. E abogado a mustra cu Gobierno den su decision ta papia di temporal te December 2020. Despues lo bay mira kico lo haci.
Awor no por papia di situacion financiero dificil. No tin fase y turismo a subi atrobe na 2021. Minister Presidente a bisa den un conferencia cu e ta premira 2022 como aña di recuperacion. Na opinion di mr. Kock, sin ayudo financiero di Hulanda, Gobierno na 2021 a cumpli cu su situacion financiero. Gobierno a pone su decision di 2020 un banda pa cu medida. Pa lunas Gobierno ta maneha cu su propio entradanan. E sindicato ta haya cu no ta hustifica medida 12.6 % cu a usa tempo cu Gobierno no tin entrada.
Gobierno a propone cu lo para medida di 5% y lo kita ATV dagen. Esaki ta incomprondibel pasobra ta pidi entrega dianan liber pero Gobierno lo no tin beneficio financiero di esaki. SIMAR a haci esfuerzonan pa reuni pa yega na solucion pero nada. Pesey SIMAR a bisa: “No pay no work”. Nan ta traha pa loke nan ta wordo paga.
Segun e abogado, Gobierno a laga comercio si reduci salario y ora di trabao y no ta haci esey cu empleadonan di Gobierno. Ta casi 2 aña cu empleadonan di Gobierno ta entrega. SIMAR a planea cu direccion di enseñanza e accion pa no perhudica e muchanan. SIMAR ta haya cu school no ta lugar pa cuida muchanan di mayornan. El a pidi Hues pa rechaza e demanda di Gobierno pa para e accion di SIMAR.
SEPPA
Mr. Mohamed a bisa Hues cu Gobierno ta anuncia cu si tene accion sin cu a avisa na tempo, ta violacion di trabao y lo no haya pago. E ta haya cu e accion di SEPPA ta na su lugar mirando e medida cu Gobierno ta tuma. E abogado tambe a splica e situacion di Covid y cu Gobierno a tuma medida na 2020 di 12.6% temporal. Aruba a recupara y no a kita e medida. Gobierno a bisa cu esey tabata un exigencia di Hulanda pa por a haya ayudo financiero. Segun mr. Mohamed, Hulanda su punto di bista ta pa baha gasto pero loke Gobierno ta haci ta viola e derecho di salario di SEPPA. Pesey SEPPA a dicidi reduci oranan di trabao. E miembronan di SEPPA kier a haya permiso pa haci lesnan priva pa cubri e 12.6 % pero Gobierno a nenga. Gobierno kier pa SEPPA duna dianan liber ATV. No por ta asina cu ta traha 100 % pero no ta haya 100 % paga. SEPPA a dicidi cu ta reduci 45 minuut di les na 40 minuut sin cu ta perhudica enseñanza pa e muchanan. El a mustra cu den sector priva doñonan di trabao a reduci oranan di trabao cu menos pago. Pakico Gobierno no ta haci mesun cos.
E accion di SEPPA tin consecuencia minimo pa comunidad y no manera Gobierno ta pretende. No mester busca maestronan extra pa duna les. SEPPA ta haya cu mester rechaza demanda di Gobierno.
Hues a bisa cu e ta pensa den un sentencia intermedio pa asina duna Gobierno chens duna contesta riba pregunta cu Hues a haci. Hues a bisa cu mas tarda 2 Maart 2022, lo tin un sentencia. Hues kier pa Gobierno mustra cu e ta bin cu medida structural y presenta na Den Haag. El a bisa cu esey ta nifica cu lo mester para accion pa algun luna. E sindicatonan a bisa cu nan ta dispuesto pa warda pa sa si tin medida structural
