Ya caba a concretisa tres Plan di Mayor cu 10 caso activo y 50 aanmelding

Michella Steenwoorde-Laclé, Coordinador

ORANJESTAD (AAN):   Michella Steenwoorde-Laclé, Coordinador di Plan di Mayor ta splica con a bay te awor cu e ley. El a bisa cu nan a haya hopi peticion cu ta drenta di Corte cu ta manda personanan pa haci mediacion na momento cu nan mes no por yega na un acuerdo di Plan di Mayor.

            Segun Steenworde-Laclé tambe ta haya personanan cu ta contact nan via nan liña di WhatsApp 569-6871, pero tambe ta haya personanan cu ta meld nan mes via e facebook page of via website www.plandimayor.org.

            E personanan aki ta yena un 'intake formulier' y ora cu ambos mayor yena esaki, ta apunta un cita pa un 'intake gesprek'. Durante di e 'intake gesprek' por calcula den ki grado di conflicto nan ta encontra nan mes pa asina sa na cual mediador ta apunta nan.

            Actualmente tin 10 caso activo y 50 aanmelding di cual tin 3 Plan di Mayor caba cu a logra despues di un trayecto minimo di 6 siman. Esun di mas largo por dura te hasta 9 luna, a indica.

            Tambe tin 6 Plan di Mucha skirbi caba di cual a entrega 3 caba, a agrega.

            E motibo pakico e mayornan no ta yega na un Plan di Mayor ta pasobra nan tin problema di comunicacion. Esey ta e aspecto principal. E di dos ta ora cu ta presenta un problema medico riba ken ta cubri gasto, etc. E di tres ta e areglo di cuido, cu tin di haber riba cuanto dia e mucha ta cerca e mama y cuanto dia cerca e tata.

            Na di cuater lugar tin e aspecto di envolvimento cu e otro mayor ta duna na e aspecto di cuido. Ta purba di laga e mayornan mes pensa riba posibel solucionnan y esaki ta bayendo hopi bon, e coordinador di Plan di Mayor a duna di conoce.