Martij Balkestein di Camara di Comercio
ORANJESTAD (AAN): Director di Camara di Comercio (KvK), Martijn Balkestein a duna di conoce cu fo'i aña 2009, KvK no a haci ningun ahuste di prijs pa loke ta nan servicionan.
Tur documentacion y registro ta disponibel na momento c'un persona ta desea di haya e informacion bishitando Camara di Comercio. Esey ta algo den ley.
Fo'i basta tempo tabatin e servicio cu for di cas of trabao por tin acceso n'e registro. A inverti miyones pa implementa esaki y pa facilita tur comerciante y tur esnan cu kier wak den e sistema di KvK.
Pero pa por mantene esaki ta costa tambe pa haci esey. Banda di esaki mester percura pa e sistema por ta protegi contra atakenan cibernetico. Mester percura cu tur comerciante ta confia cu KvK ta proteha contra un atake cibernetico, a bisa.
Pa mantene e sistema mester tin entrada y KvK no a aumenta su prijsnan desde 2009. Tabatin inflacion di 20% e momento ey y KvK no a haci nada. Pero na dado momento mester percura pa e sistema por keda activo. Si no ta financia esaki e ora no por garantisa cu e ta keda safe, a remarca.
Segun Balkestein, nan a wak loke KvK di Bonaire, di Sint Maarten y Hulanda a haci. KvK Aruba a cobra menos cu tur e otronan pa haci esaki.
Clientenan mes ta indicando cu aworaki nan ta sinti mas safe door di entre otro, pidi un ''two steps verification' y cu nan datonan ta bon warda.
