Durante un reunion publico den Parlamento,
ORANJESTAD (AAN): Diabierna ultimo den e reunion publico na Parlamento di Aruba, Gobierno di Aruba a duna mas informacion riba e acuerdo cu nan a yega cu Gobierno di Hulanda riba e tema di financiamento di debe. Durante e reunion, Prome Minister Evelyn Wever-Croes a splica e acuerdo aki detayadamente, y a presenta tur e corespondencianan cu tabata tin pa cu e negociacion riba e acuerdo aki.
Prome Minister a indica cu e reunion a bay bon, y cu tabata tin hopi pregunta relaciona cu e acuerdo, cu a wordo contesta, pa asina aclarea cualkier duda cu por tabata tin. Parlamento tabata hopi interesa pa scucha kico lo ta e siguiente pasonan, mirando cu ta aki ta unda nan lo wordo envolvi. Pa cu esaki, Prome Minister a reitera y confirma na nan cu Gobierno lo cana e caminda cu Parlamento a indica durante di un IPKO na Sint Maarten.
E acuerdo entre Gobierno di Aruba y Gobierno di Hulanda lo wordo firma pronto, pa asina e interes riba e debe di Covid-19, por baha di 6.9% pa 5.1%. Prome Minister a splica cu Parlamento a hunga un papel hopi importante pa cu e acuerdo aki, mirando cu nan tabata tin un posicion hopi firme pa no entrega, pa loke nan ta kere ta e autonomia di pais Aruba, sin haya nada a cambio. Pa cu esaki ta importante pa splica cu Parlamento lo mantene su autonomia bou di e LAft, pasobra e autonomia financiero a wordo entrega caba na 2015 door di AVP, dunando Hulanda un poder grandi pa tin e ultimo palabra den cambionan.
"Manera mi a menciona, mi lo a prefera di no mester a yega na un Rijkswet, pero mi ta hopi satisfecho cu e acuerdo aki, mirando cu e ta trece claridad, trankilidad y e ta baha e interes, cu ta duna Aruba e aña aki 16 miyon florin cu por wordo inverti den proyectonan.
Pa loke ta oposicion, mi a keda desapunta ya cu no tabata tin niun interes di nan banda. Por a nota si cu nan tabata hopi rabia y disgusta, y a expresa di no por a kere cu un dia nos lo yega na e acuerdo aki, mustrando cu nan nunca tabata tin e intencionnan corecto pa cu e pueblo di Aruba.
E trayecto di e Rijkswet lo cuminsa pronto, manteniendo e autonomia di Parlamento y pais Aruba. E logro di e acuerdo aki ta un "game changer" pa Aruba, mirando cu e interes di e debe lo baha den beneficio di nos futuro generacionnan" Prome Minister a expresa.
