Wind Creek Crystal Casino a lansa nan wega nobo: ‘Battle Challenge’

ORANJESTAD (AAN) – Wind Creek Hospitality tin e grato placer di anuncia e lansamento oficial di nan wega di mas nobo; ‘Battle Challenge’,

na Wind Creek Crystal Casino. ‘Battle Challenge’ ta un wega cu lo eleva e experencia di e hungador aun mas unda cu e hungadornan lo desafia otro den un careda di auto pa asina gana premionan extra.

            Di acuerdo cu Sr. Ken Rohman, Chief Marketing Officer pa Wind Creek Hospitality; “Battle Challenge ta un wega unico di nos mesun cas, unda cu hungadornan ta competi contra otro den un careda di auto pa gana premionan atractivo pero simultaneamente ta hunga contra casino riba un slot machine”. Segun Rohman, mester pone enfasis riba ‘gana premionan extra’ sin agrega placa additional den e machine. E ta simplemente un otro nivel di wega y competencia cu lo beneficia nos hungadornan aun mas ricibiendo mas incentivo.

            Wind Creek Hospitality a pensa riba un manera pa crea un wega propio pa su hungadornan pa asina nan por competi contra otro pa gana premionan extra. Asina a desaroya y crea ‘Battle Challenge’. Hungadornan cu kier experencia e wega aki, ta simplemente hunga na e slot machine manera semper nan a custumbra, simplemente awor lo tin un extra screen pa hunga contra otro. Mester wak e wega aki como un ‘Go-Kart’ virtual. E auto di cada hungador lo core a base di nan ganashi riba e slot machine, pues mas bo gana riba e slot machine, mas liher y dilanti bo auto ta bai rond di e ‘track’ y na final gana e careda. E wega ta bira excitante ora cu e hungadornan ta bataya contra otro uzando varios triki den e wega manera ‘slow down’ un otro hungador of pone trampa den caminda.

            Un careda ta dura mas o menos 2 minuut, na final ta premia e prome, segundo y tercer lugar di cada careda. Hungadornan por gana premionan manera ‘free play’, credito pa cuminda, incentivo extra di casino cu ta wordo reconoci pa Renaissance Aruba Resort & Casino.

            Wind Creek Hospitality a introduci e wega aki caba na comienso di aña na nan localidad di Pennsylvania, siman pasa a lansa esaki tambe na Alabama y awor a toca turno pa Aruba como nan prome localidad international. Di acuerdo cu Sr. Paul Gielen, Gerente General di Renaissance Aruba Resort & Casino; “Nos ta sumamente contento di por agrega ‘Battle Challenge’ na nos casino. Nos ta convenci cu e wega aki lo duna nos bishitantenan un otro experencia ora di hunga na Wind Creek Crystal Casino dunando asina extra incentivo cual nan no lo experencia na ningun otro casino aki na Aruba.

            ‘Battle Challenge’ ta cla pa ranca sali cu su prome careda na Wind Creek Crystal Casino situa na Renaissance Aruba Resort & Casino.