Recientemente Director di EPB - San Nicolas, Sr. Rensley Mathilda a haci entrega di dos bunita plakaat na dos docente
cu a cumpli 25 aña den nos Enseñansa na Aruba. Docente Ariane Daly di Expresion a cumpli 25 aña mientras docente Gilbert Thijzen di Ciencia tambe a cumpli 25 aña den Enseñansa.
Director Mathilda tabata tin palabra di elogio pa e gran contribucion di sra. Daly y sr. Thijzen na nos alumnonan di EPB-San Nicolas. Ambos persona a duna gran parti di nan bida na educa e studiantenan, cu ta bira despues personanan ehemplar den nos comunidad. Na final Sr. Mathilda a haci entrega di un bunita plakaat traha di obra di palo na docentenan Daly y Thijzen.
Den nomber di Staf y personal como tambe alumnonan di EPB San Nicolas nos kier a felicita y alabez yama un danki na e docentenan Daly y Thijzen cu nan aniversario.
Seccion Hubentud den Movecion tambe ta yama pabien na e dos docentenan aki, pasobra nan tin un tarea sumamente valioso y indispensable, manera e formacion educativo di e generacionnan nobo.
