Vuelo di British Airways ta manera un soño a bira realidad

Jo-Anne Arends di Aeropuerto:

ORANJESTAD (AAN): “The British are coming!”  Esey ta un joke cu DIARIO a tende Diahuebs atardi den VIP Room di Aeropuerto Internacional Reina Beatrix, ora cu a anuncia cu despues di mas di 10 aña di negociacion, porfin Aruba ta haya e alegria di a logra di cristaliza un dos vuelo regular pa siman, cu ta conecta Reino Uni direct cu e isla.

   British Airways vuelo BA2157 ta sali for di London pa 10:00 am y ta yega Antigua pa 1:35 pm.   Despues e ta sali di Antigua pa 2:35 pm, y ta yega Aruba pa 4:30 pm.

   British Airways vuelo BA2156 ta sali for di Aruba pa 6:30 pm, y ta baha na Antigua pa 8:15 pm.  Despues pa 9:15 pm e ta sali y yega London Gatwick e siguiente mainta pa 10:15 am.

   Jo-Anne Arends kende ta Air Service Development Manager di AAA NV, riba Diahuebs atardi a bisa cu Aeropuerto di Aruba ta ricibi 11 vuelo pa siman for di Europa.  Siete di esaki ta di KLM cu ta opera un vuelo pa dia for di Amsterdam.  Tin 3 vuelo di TUI Nederland, y tin un servicio di temporada di TUI U.K.   Esey ta equivalente na 18.000 asiento pa siman.  E mercado Europeo ta representa 14% di e cantidad cu asiento di pasahero actual.

   Awor cu British Airways ta bay cuminza bula tambe, Aruba lo bay conta cu un crecimento di 15% den capacidad di asiento pa luna.

   “British Airways sigur ta un match perfecto den e cuadro y maneho di strategia di Aeropuerto pa sigui atrae mas aerolinea for di mercadonan di Europa y Latino America, cu tin un modelo di negoshi diferente cu por opera den nan temporada off-peak.  Esey nifica, bula riba dianan menos druk, y asina Aeropuerto por maneha e fluho di pasahero, brinda un bon servicio, y tambe optimaliza e uso di e infrastructura di Aeropuerto na Aruba,” Jo-Anne Arends a bisa.

   Jo-Anne Arends a menciona algun nomber di funcionarionan cu a traha incansable pa a haci e soño aki bira realidad, y a menciona e.o. nomber di Barbara Brown, Sanju Daryananani, Tirso di ATA Europa, Joanna di ATA U.K., y el a splica cu pasenshi y pasion hunto cu perseverancia nan a logra cosnan grandi.