Segun Agencia Internacional di Energia
ORANJESTAD (AAN): E Agencia Internacional di Energia (IEA) a aumenta e siman aki nan pronostico pa crecimento di demanda mundial di petroleo pa e aña aki, cu lo ta acelerando na costo di gas mas caro.
E aumento di e demanda petroleo a wordo revisa na un subida di 380.000 bari pa dia. Segun e pronostico mensual actualiza di IEA, cu sede na Paris, e demanda lo aumenta asina na 2.1 miyon di bari pa dia, y lo yega na 99.7 miyon di bari pa dia den 2022.
Pa aña 2023, e demanda lo sigui crece te cu 101.8 miyon di bari pa dia, y lo bay sobrepasa nivelnan prome cu pandemia.
IEA ta bisa cu e prijsnan di petroleo a baha cu 30 Dollar desde e nivelnan cu el a yega na dje na juni, debi na un aumento den oferta y e temor riba un slow-down di economia mundial.
Pero na mesun momento, prijs di gas y di coriente a yega na nivelnan maximo nobo, y cu algun pais a haya nan obliga na reemplaza gas pa petroleo.
“Cu varios region sufriendo di olanan di calor, e ultimo datonan ta confirma cu ta haciendo mas uso di petroleo pa genera electricidad, particularmente na Europa, Medio Oriente, aunke tambe na Asia,” segun IEA a bisa.
“E cambio aki den uso di combustible tambe ta wordo produci na e industria europeo, incluyendo e refinerianan,” segun e boletin ta indica.
E aumento di demanda petrolero pa e aña aki ta sconde toch cierto ‘debilidadnan’ den otro sectornan, y un slow-down di su crecimento, cu lo pasa di 5.1 miyon di bari pa dia na comienzo di aña, na menos di 100.000 bari pa dia den e ultimo trimester di 2022.
E oferta mundial di su banda a yega un maximo despues di pandemia di 100.5 miyon di bari pa dia na Juli, cu e meta di haci cierto operacionnan di mantenimento na Noordzee, na Canada, y na Kazakhstan.
E organizacion OPEC y su aliadonan a aumenta marginalmente nan produccion. Tambe IEA a revisa su pronostico pa Rusia, “debi na e impacto aworaki causa pa e sancionnan Europeo y Mericano.”
