Varios mural nobo ta apareciendo tur caminda durante Artweek Aruba 2022

ORANJESTAD (AAN): E siman aki e isla ta observando “Artweek Aruba 2022” den e area full rond di Promenade na San Nicolas.

   Durante Artweek 2022, diferente artista internacional ta na Aruba y nan a crea bunita mural riba murayanan na San Nicolas.

   Artweek Aruba 2022 culmina e weekend aki.  Pues dianan 4, 5, y 6 di November lo bay tin e di cinco aña cu ta celebra Aruba Art Fair.  E biaha aki tin 80 artista local y internacional cu ta desplega nan arte.  Lo bay tin poesia, musica, cuminda, cantamento, exposicion cultural, pop-up fine dining restaurant di Divi, y tambe Kulture Kafe.  Diasabra lo bay tin un Parada Cultural tambe den e Aruba Art Fair.

   Si bo kier mira loke e artistanan (incluyendo uno di Taiwan) pintando e muralnan, bo por acudi pa Aruba Art Fair y check nan.

   DIARIO a nota cu den dia tambe tin masha hopi turista ta cana cu camera y sacando potret tur rond di Promenade.