Partido MEP cu donacion na Fundacion Ban Uni Man pa Cria Nos Muchanan

ORANJESTAD (AAN) Manera ta conoci, siman pasa diadomingo partido Movimento Electoral di Pueblo (MEP) tabatin sorteo di e grandioso rifa “Un Aruba Stabiel cu MEP”.

   Desde inicio partido a compromete cu parti di e fondonan recauda, lo worde entrega como donacion na un instancia cu tin necesidad di esaki. E siman aki partido tabatin e grato placer pa haci entrega di cheque di  Afl 3.000,- na “Fundacion Ban Uni Man pa Cria Nos Muchanan”.

   E fundacion a traves di e fondo aki lo por yuda 5 mucha haya desayuno tur mainta na scol, pa un aña largo. Fundacion Ban Uni Man pa Cria Nos Muchanan sigur merece e fondo aki, pa nan inmenso y bunita trabao cu nan ta haci y considerando cu actualmente nan tin problema cu fondo.

   Lider di Partido MEP Evelyn Wever-Croes ta gradici sr. John Fun pa e bunita trabao cu ta eherce a traves di e fundacion y ta spera di curason cu e fondo ta yuda na e bon causa aki. ‘Danki na tur cu a haci e rifa un exito cu nos por a haci e donacion.