Un animador multifacetico
ORANJESTAD (AAN): Un di e legendario persona di farandula y entretenimento na Aruba, persona cu a fungi como MC pa diferente concierto di caliber halto na Aruba, un hende cu a trece un epoca nobo di discoteca pa e isla, y su estilo unico di anima cualkier evento carnavalesco cu su voz, a hala su ultimo rosea riba Diahuebs mainta.
Ruben L. Garcia a bay descansa, lagando Aruba cu memorianan valioso di su voz, su opinion alegre riba tur asunto, su sosten indudable pa artistanan local, y sin chens di a goza di su oficina nobo cu e emisora Power 101.7 FM a caba di construi pe na Piedra Plat.
Ruben ‘Scorpio’ Garcia a nace na Aruba riba 30 di October 1952, pues Diadomingo cu a pasa el a cumpli 70 aña. Y e ta e persona cu a sa di alegra bida di ciudadanonan, oyentenan, televidentenan, y publico cu su estilo diferente y progresivo pa anima cualkier actividad! Y e ta pone su mes fuertemente den caracter pa cada evento tambe!
Na emisora di radio: Su comienzo tabata na Radio Kelkboom AM 1440 kHz na aña 1970 den e studio cu e emisora tabatin den Emmastraat na Playa (net diagonal pazuid di ex-Texas Furniture Store).
Despues di seis aña el a cruza pa Radio Centro, cu tabata transmiti cu Voz di Aruba AM na 1320 kHz, unda e tabata anima show den oranan di atardi. E tempo ey e tabata logra di trece semper e hitnan grandi prome den aire, y esey ta algo cu publico tabata goza di dje. Su spectrum di musica tabata amplio, y tabata yuda tene Aruba den suspenso ora cu un cancion nobo ta na caminda.
Asina mes na April 1985 ora cu e cantante Paul Hardcastle a anuncia cu su cancion ‘19’ lo bay sali, ta tur emisora rond mundo tabata wardando pa nan haye y pa nan transmitie. Ruben na Aruba tambe via Voz di Aruba tabata priminti oyentenan cu e lo bay haye prome cu tur otro emisora. Y su audiencia tabata masha grandi mes, ora cu el a anuncia cu e tin e disco y ta cla pa tok’e. El a keda ripiti e cancion henter atardi, pasobra oyentenan tabata keda yame pe.
Tempo di Scorpio’s Disco: Na Voz di Aruba tambe durante epoca di Carnaval, Ruben Garcia hunto cu Django Simoons a cuminza cu e programa “Aki Aya”, cu a habri caminda pa e tipo di programanan aki dedica pa duna tur update riba asuntonan di Carnaval.
Durante decada di 1980, e influencia di musica disco tabata asina fuerte, cu el a haya algun socio cu hunto a habri Scorpio’s Disco cu a wordo crea den e edificio di Surfside banda di lama. Esaki a explota den popularidad, y diripiente tur hende tabata busca forma pa weekend acudi na Scorpio’s Disco pa scucha musica, goza di efectonan di luz, y tende con discjockeynan tabata ‘mezcla’ musica.
Scorpio’s Disco ta e discoteca cu a yuda impulsa creacion di otronan cu tambe a bira popular despues, e.o. Scaramouche Disco y tambe Club Visage. Pero hopi hende tabata goza di e ambiente cu Scorpio’s Disco tabata crea, y e fiestanan special cu tabata wordo organiza eyden door di Ruben mes.
Despues di esey, Scorpio’s Disco a cambia di man, y e club posteriormente a wordo yama Contempo Disco.
Riba emisora di FM: Mientras tanto na radio, su popularidad na Voz di Aruba, a impulse pa drenta riba frequencia di FM. El a cuminza poco-poco tur Diadomingo ta reemplaza Lucio Rivadeneira cu tabatin e show di merdia cu yama ‘Disco Sensation’. Tur Diadomingo merdia, Ruben a sa di mantene e show ey di Disco Sensation keda stabil den aire pa basta aña.
Asina na 1989 el a bay full-time pa Canal 90 FM. Aki tambe el a sigui cu e animacion cu a haci e emisora bira extremadamente popular. El a sigui cu e programa di Carnaval tambe cu a pone Aki Aya bira mas grandi.
Paso pa Television: El a amplia su curiculo y cu Telearuba a cuminza transmiti tur Diadomingo un show musical varia cu yama ‘Smash-13’, un show live cu musica, show di baile, y entrevista. Esaki ta un di e pasonan cu el a tuma, cu a demostra cu e ta hopi adaptable pa show na TV.
Na 1996 ora cu e canal nobo di TV na Aruba a habri, esta ATV-15, el a profila su mes tambe como presentador di varios show di Carnaval como tambe di Pasco.
Na comienzo di milenio nobo, el a bay cu su programa pa e emisora di Magic FM den Caya Betico Croes, y manera semper e tin su fanaticonan cu ta sigui su tras y scuche unda cu el a bay.
Durante decada di 2010, el a haya oferta pa bira gerente general di e emisora Bliss FM cu a cambia di doño, y cu a bira Power FM na 101.7 MHz. Fuera di esey e tabata presenta su show tur mainta.
Propaganda na monton: Ruben Garcia su voz ta uno cu por cambia ki ora cu ta. Companianan tabata buske specialmente pa traha propaganda pa nan productonan. No djis na Aruba, pero hasta companianan di Curaçao y tambe Bonaire tabata busca su servicio di “voice” pa propaganda wordo pasa sea na emisora of na TV na e otro islanan.
Na varios actividad oficial, Ruben Garcia a fungi como maestro di ceremonia. Cu un conocemento di protocol pa actonan oficial, e tabata sa ki ora ta actua serio, y ki ora e por ta e homber di mas jolly riba e planeta aki.
E ta conoci tambe pa ta promotor cu ta trece concierto na Aruba. Tabatin un actividad unda el a hasta keda varios luna sin pela cabey, pa asina durante e concierto e ta bay sinta riba stage, y eyriba en vivo dilanti miles di hende nan a corta su cabey full pe.
Salud a bira tiki debil: Ruben Garcia a spanta su publico algun luna pasa, ora cu el a haye ta bay te na Colombia pa atende algo urgente pa salud. Esey tabata asunto di curazon. Esey tabata e prome indicacion cu e popular animador tin contratiempo cu salud.
Pero el a logra recupera, te cu el a bin bek y publico tabata contento cu e sanacion. Sinembargo ta otro problema di salud a pasa bishit'e, cu a pone wordo interna na Hospital. E biaha aki problema di rosea, a hasta pone cu el a wordo interna den Unidad di Cuido Intensivo. Y aki mes ta unda cu Diahuebs mainta el a hala su ultimo rosea.
DIARIO y famia Mansur, ta manda e mas sentido palabra di pesame, deseando su casa, su yiu- y nietonan tur forza den e dianan aki. Condolencia na su coleganan, su famia extenso, y fanaticonan.
