Varios minister tin diferente pensamento riba e tema di waf di San Nicolas pero nada tin concreto  

Errol de Freitas, Presidente di SNBA:

ORANJESTAD (AAN) – Den entrevista cu Errol de Freitas, Presidente di San Nicolas Business Association (SNBA), DIARIO a puntr’e tocante e tema di e waf di San Nicolas, cu mester a habri despues di eleccion, pero cu te ainda nada a sosode y ningun proyecto a worde desaroya den e area aki.

Segun de Freitas tin varios minister cu tin diferente pensamento riba e tema aki, y ta importante si por separa tur cos for di otro, y mira kico ta primordial y urgente.

“Urgente ta cu nos tin cu pensa cu nos tin e miho waf den Caribe, y nos no por laga esey bay perdi. E tin cu haya su contenido. Di tur e proyectonan cu tin pendiente, nos ta pendiente di gobierno pasobra normalmente, nos mester ta tene un reunion na December of na Januari, locual no a pasa, pero di nos banda nos ta trahando un samenvatting di e proyectonan pa nos wak kico nos ta bay haci e aña aki. Nos a tende di tur ideanan, accionnan, di eagle LNG, pero tin hopi mas aspecto di e tereno di waf aki cu nos por explora”, De Freitas a subraya. E ta kere cu aki dos siman por wordo entrevista bek y e lo tin mas informacion, pasobra e ta un must!