Darren van Ommeren, hopi agradecido:
ORANJESTAD (AAN) – Darren van Ommeren, Presidente di SMAC, den entrevista cu DIARIO a duna di conoce cu nan a yama un conferencia di prensa, den cual a recapitula e resultado di Aruba su Carnaval 70, cu tabata super exitoso y SMAC tabata tin un bon timer. El a expresa su gradicimento pa e gruponan, e participantenan y e musiconan cu a aporta na esaki pa e tabata un exito total.
Van Ommeren a agrega cu alavez SMAC a presenta un oferta cu nan tin riba mesa, cu a wordo manda diaranzon 14 di Februari aki, pa Stichting Musica, cu tres opcion pa loke ta festival di musica den e futuro temporada di carnaval.
E opcion number uno ta cu Stichting Musica ta keda organiza solamente Caiso y Socca Monarch y contribui cu SMAC cu un suma di 15 mil florin. Punto 2 ta cu nan ta keda adopta e festival di Calypso y Roadmarch infantil/hubenil, y den e caso aki nan ta haya tambe Caiso y Socca Monarch den un solo pakete y ta duna un contribucion di 15 mil florin, y punto #3 ta cu nan ta tuma festival di tumba infantil, hubenil y grandi, Calypso y Roadmarch, Caiso y Socca Monarch, cu ta bira full un pakete y no mester di duna SMAC ningun contribucion, pero tin cu core cu tur gasto di loke ta e festivalnan di musica menciona.
E informacion aki a bay pa Stichting Musica diaranzon y nan ta duna nan te dia 29 di Februari en curso pa reacciona y si nan no kier tuma ningun di tres, pasobra nan no por tuma tur e festivalnan y nan no kier contribui, si esey ta e caso SMAC ta tuma un decision kico lo haci, pa loke ta e festivalnan nan futuro. Asina van Ommeren a remarca.
