Magaly Maduro:
ORANJESTAD (AAN): Diaranzon mainta a tuma lugar un conferencia di prensa, relaciona cu un convenio cu a wordo firma entre Bureau Sostenemi (BSOST) y Departamento di Mucha y Hoben (DMH) y durante e conferencia di prensa, Magaly Maduro director di BSOST a hiba palabra.
El a splica cu Bureau Sostenemi ta hopi contento cu despues di un tempo basta largo awor por firma un acuerdo di trabao cu DMH.
“Ta sumamente importante pa tur dos ta ancra den ley y ta importante pa nos sostene otro, pero tambe ta importante pa nos sa ki ora ken tin cu haci su trabao”.
Esaki ta nifica cu nos lo no mete den nan trabao y nan tampoco den nos trabao, segun Maduro.
El a sigui bisa cu e 5 pasonan di e Codigo di Proteccion mester wordo sigui sin falta y sin ningun excepcion.
Segun e director, si a caso den e Codigo di Proteccion bo pega un caminda, e persona cu ta traha na e centro di cuido sa cu e tin un supervisor.
“Tin dos supervisor pa cierto cantidad di centro di cuido, pasobra nan ta bastante”.
E supervisor ta esun cu por duna e guia y si tin casonan unda cu e no ta compronde of ta trata di un caso mas dificil of grave, e por tuma contacto cu Bureau Sostenemi.
Eynan nos tin trahadornan cu por coi telefon y duna e conseho cu lo bira un melding, despues di cual ta sigui e proceso manera cu e mester sosode, segun Maduro.
El a sigui bisa cu e ta spera cu door di firma e acuerdo lo bin claridad, pasobra eyfo tin un expectativa di Bureau Sostenemi cu no por cuadra cu realidad.
E director a bisa cu no por ta asina cu Bureau Sostenemi ta e unico instancia aki na Aruba cu ta atende cu proteccion di mucha.
“Cada un di nos ta responsabel pa esaki, sea e ta como mayor, educador of como cuidador”.
Si cada un carga su responsabilidad, nos ta yega hopi mas leu, segun Maduro kende a indica cu BSOST ta traha cu cuerpo y alma y ta yuda te unda cu nan por.
