Un gran tocado y doño di Caha ‘i Orgel ‘Nos AnaRosa’ a bay laga nos

Marcelo ‘Buchi’ Irausquin

ORANJESTAD (AAN): Un noticia tristo cu Buchi a fayece.  Marcelo Irausquin, cariñosamente yama Buchi, naci dia 4 di September 1936 a fayece dia 24 di Februari 2022. Sr. Buchi a casa cu señora Sylvia Feliciana riba dia 25 april 1957 y for di nan a nace 7 yiu, cu esaki a yega na 19 nieto/-anan y 25 bisanieto/-anan.

   Buchi, kende a nace den e bario di Brazil, for di jong caba e tabata labora den e mundo di construccion. Buchi tabata conoci pa hopi como un persona recto, estricto, perfeccionista, semper di bon curason y cla pa yuda tur hende.

   Den su tempo liber bailamento tabata su pasion, y Buchi a forma parti di e grupo di baile ‘Flor di Brazil’ principalmente bailando e musica folklorico y musica tipico di Aruba.   Desde momento ey su amor pa caha di orgel a nace y asina a cuminsa toca su prome caha di orgel, cual pa casualidad tambe tabata yama ‘Sylvia’.

   Mas o menos 25 aña pasa, danki na un bon amigo sr. Patan Faro, el a logra yega na su propio caha di orgel, cual a worde fabrica na Curaçao, unda tambe el a biba pa varios aña.  E caha aki cu te dia di awe ta funciona y cu ta den bon mantencion yama ‘Nos Anarosa’,  nomber di su nieta mas chikito e tempo ey. Buchi hunto cu amigonan, sres. Jachi Maduro y Pablo ‘Paus’ Henriquez, conoci tambe como Torro di Westpunt den feliz memoria, riba wiri tabata toca e caha ‘Nos Anarosa’ den Festival di Bon Bini, un festival popular tanto pa turista y hende local. Banda di esaki e tabata tin e honor di toca na varios actividad cultural.

   Buchi tabata un hende devoto na Iglesia Catolico y desde cu e tabata biba den e bario di Santa Cruz el a cuminsa yuda durante sacrificio di misa haciendo trabao di colectant. Tambe tabata maneha e yabi di santana y mainta tempran prome cu e Misa di Aurora e tabata cana bay pa habri porta di misa y bati klok di misa.

    Mas o menos 4 aña pasa a constata e malesa di Alzheimer cerca Buchi y desde e tempo aki poco poco no por a sigui cumpli cu su trabaonan pa comunidad. Dia 24 di februari 2022 Buchi a cera su wowonan y a bay sosega y asina a bay laga e famia atras cu hopi recuerdo.

   Condolencia y forsa na su señora Sylvia, su yiunan, nieto- y nietanan, bisnieto- y bisnietanan,  famia Irausquin, Feliciana, demas famia, amigo y conocinan, y su coleganan di Caha di Orgel.