ORANJESTAD (AAN) – Den conferencia di prensa di Gobierno, Diahuebs di e siman aki, na encargo di Minister di Husticia y Asunto Social, señor Rocco Tjon,
el a elabora tocante e tema di seguridad di Aruba su fronteranan, y ademas a aborda e tema di empleo duna na personanan ilegal pa locual tin un pakete pisa di medida na caminda, pa companianan responsable y pa esnan cu ta wordo emplea.
Minister Tjon a tuma nota, e siman aki, cu 11 persona a purba di drenta Pais Aruba na un manera ilegal (y cu no a logra ya cu e boto a wordo intercepta door di Guardacosta).
Pero e mandatario mas bien a enfoca riba e plan di accion di control na frontera (aanpak greenstoezicht) cu el a bisa cu e kier a splik'e miho.
E mandatario a bisa cu esaki ta un plan cu a wordo skirbi pa Pais Aruba hunto cu Hulanda, y cu Hulanda a aproba, den cuadro di e Landspakket. Na November ultimo a aproba 4 miyon euro pa ehecuta esaki. El a splica kico su ehecucion ta nifica.
“Obviamente e cooperacion entre e diferente departamentonan ya caba a wordo intensifica, y aworaki ta papia di e radar kamer, cu ta wordo ocupa 24 ora pa dia, den cuadro di cooperacion entre Kustwacht, Guardacosta, Cuerpo Policial, y e Surveillance Team cu ya caba ta haciendo su trabaonan.
Pero hopi importante tambe, den e plan di accion, ta cu nos ta bay enfoca mucho mas den e parti investigativo. Tin fondonan disponible aworaki, pa nos bay lanta un departamento interdisciplinario, pa loke ta inteligencia y informacion, y a base di esaki, obviamente, por bay investiga full e network, pasobra un persona cu ta bin Aruba mester haya cooperacion di esnan aki na Aruba y nos ta bay ‘takel’ esey miho tambe”, Minister di Husticia a señala.
Pa loke ta e parti di conduci investigacionnan, Tjon a agrega, e departamento di “opsporing mensenhandel en mensensmokel”, di Cuerpo Policial, lo bay wordo amplia, a base di e fondonan menciona.
“Y hopi importante tambe ta cu lo percura pa tur e parternan maritimo, manera Kustwacht y Polis Maritimo tambe wordo conecta na e plataforma aki. Anto di e forma aki por percura cu e investigacionnan ta wordo conduci mucho miho, y bo ta hacie menos atractivo pa localnan, y personanan cu ta ubica akinan, yuda y facilita esnan cu ta purba bin Aruba na un manera ilegal”, Minister di Husticia a bisa.
