Un biaha mas e Toren den lama na Palm Beach ta den deterioro total

E plataforma renoba no a dura ni 4 aña...

ORANJESTAD (AAN): Den fin di siman cu a pasa, tabata exactamente 4 aña desde cu e ‘Toren’ cu tin den lama na Palm Beach, dilanti RIU Palace Antillas Hotel Aruba a wordo renoba completamente.

   E renobacion na Juni 2018 a wordo haci via di un Public Private Partnership, hunto cu e dinamico gerente general Juan Blanco e tempo ey di RIU Antillas.  Di e forma ey, Gobierno y sector priva a traha hunto pa mehora e producto Aruba, y sector priva a mustra disponibilidad pa cubri e inversion aki.

   Tempo cu el a wordo re-inaugura, Ministro di Turismo Dangui Oduber a expresa con e Toren aki a wordo completamente renoba.  El a mustra cu e proyecto ta eleva e calidad di e producto Aruba, pa asina atrae turistanan di calidad.  Fuera di esey, e ta importante pa tur localnan cu ta haci uso di e Toren.  El a inclui un plataforma circular estilo Pier, cu trapi pa asina hende subi safe.  El a wordo hasta geverf den colornan patrio di Aruba.

   Pero awor na 2022: Sinembargo den apenas 4 aña di tempo, e Toren aki no a sobrevivi completamente e situacion atmosferico, y e olanan cu tabata azota esaki de vez en cuando.

   Awor na Juni 2022, por mira cu mas di mitar di su plataforma a desaparece.  E ta kibra, y ta djis un pida a keda ainda visible.  E trapinan tambe a desaparece, pues awor ta hendenan aventuroso so por subi esaki bay ariba.

   DIARIO a tuma nota di e estado di e Toren aki recien, ora cu e grupo musical HoneyPot a lanza nan videoclip nobo yama ‘Straight Out The Caribbean’, graba cu drone shots di e cineasta local Dani Cruz.

  E final di e videoclip a inclui un grabacion di e Toren aki na Palm Beach.  Y aki ta unda bo por mira con deteriora el a bira.  E video ta mustra cu como 55% di e plataforma ya no tey mas.  Apenas 45% a keda atras, y e ta peligroso si cualkier hende perde balans y cay for di dje na e parti kibra.

   Ta di spera cu tanto DOW como tambe Ministerio di Turismo tuma bon nota di loke ta pasando, como cu ora e Toren aki ta na ‘werki’ den bista di miles di turista, e ta trece un efecto indesea cerca e bishitantenan.

   E screengrab aki di HoneyPot su video clip ta mustra pueblo e situacion di e Toren.  Danki na e videoclip aki cu ta riba YouTube, por a haya sa con deteriora el a bira.  E cineasta Dani Cruz a hasta splica DIARIO, cu ora nan actor a subi e Toren pa e grabacion aki, el a herida su mesun curpa, como cu e no tin trapi mas pa haci esey na forma safe.