Mayra Janga, Hefe di Hipoteca:
ORANJESTAD (AAN) –Mayra Janga, Hefe di Departamento di Hipoteca na FCCA, a contesta un pregunta den conferencia di prensa, Diabierna, tocante e rekisitonan pa aplica pa e plan nobo di hipoteca na interes reduci, cu e compania a caba di introduci.
Janga a splica cu e ta depende di e entrada di e personanan, e tipo di financiamento, e suma cu ta bay pidi y e balor di e cas.
“Dependiendo di tur esaki, e ora ey nos ta haci un calculo y e añanan tambe cu e prestamo ta bay ta. Ta depende tambe di e riesgo di financiamento y kico ta bay ta y e necesidad di e cliente, nos ta duna nan e interes cu ta pas den e situacion di e famia ey. Pues e ta depende di cada famia”, Mayra Janga a splica.
El a reitera cu e ta un bahada substancial di interes di loke tin na interes actualmente. No tin un tarifa fiho pa menciona aworaki, sino cu e interes ta bay depende di e situacion di cada famia, Janga a reitera.
Ciudadanonan cu tin hipoteca cu un banco caba, FCCA por take esaki over, señora Mayra Janga a indica, pero depende di e situacion si e cliente por carg'e ainda. E mester paga su debe bek y esey ta haci cu si e persona ta califica pa su prestamonan wordo consolida hunto cu e hipoteca, FCCA ta haci esaki y ta reduci e interes tambe a base di e persona su entrada y su gastonan.
