Trinidad & Tobago a repatria 650 Venezolano den fin di siman

PORT OF SPAIN: Autoridadnan di Trinidad & Tobago a impone medidanan fuerte pa mitiga e brote di Covid-19, durante un acto pa repatria Diasabra un total di 650 Venezolano pa nan pais.

   Funcionarionan di Embahada di Venezuela na Port of Spain, a bisa cu e viahe a wordo haci via un Ferry comercial cu ta cubri rutanan interno na Venezuela.  E Ferry “Paraguana I” a yega Port of Spain riba Diasabra pa 6:00 am, y ta pertenece na e compania Nueva Conferry cu sede na Las Piedras, y esaki ta prome biaha den nan historia cu nan a haci un viahe internacional.

   Decenas di pasahero ya tabata riba waf sperando nan, ora cu e barco a mara na e Compleho di Crusero.   E viahe mes lo a dura 10 ora, y ta spera cu e lo bay mara na e waf di Guanta, na estado Anzoategui.

   Autoridadnan na Trinidad & Tobago a bisa cu un team medico lo subi e Ferry prome pa haci un control preliminar di cada pasahero ora cu nan yega Venezuela, y cu tur esnan riba e barco lo haci test di PCR pa detecta Covid-19.

   Tur pasahero registra y confirma ta bay di forma voluntario y no mester a paga nada.  Unico cu nan mester a paga tabata e Impuesto di Salida di 75 Dollar na e Waf, segun reglamentonan di Trinidad & Tobago.

   E logistica di e viahe a wordo organiza hunto cu Embahada di Venezuela y autoridadnan di Trinidad & Tobago.

   Autoridadnan di Trinidad & Tobago a pidi e viaheronan pa nan yega nan so na Waf, pues evita di wordo acompaña pa famia na e despedida, pasobra tin di corda cu ainda e isla ta den un pandemia y protocolnan ta hopi estricto eynan.

   Aunke nan a haci e anuncio aki adelanta, toch tabatin algun escena caotico na Waf banda di Diasabra merdia, ora cu varios persona cu no ta parce di ta viahero, a aglomera eynan.

   Di algun dia caba, Embahada di Venezuela ta pidi e Venezolanonan pa bay eynan pa busca nan ticket pa por subi e Ferry y regresa nan pais.  Tabata parce cu e lista lo yega 700 Venezolano.

   Pero na final, ta 650 Venezolano a subi e Ferry.  Ningun hende por bisa si acaso lo bay tin e di tercer viahe di repatriacion.  E prome tabata na Februari via di avion pa Caracas.

   Gobierno Venezolano mes a start na September 2018 cu e asina yama ‘Plan Vuelta a la Patria”, y te cu awor como 25.114 Venezolano a regresa e pais.  President Nicolas Maduro a bisa cu e plan aki ta busca pa haci e regreso di Venezolanonan mas facil, specialmente esnan cu ta sufriendo di atakenan xenofobico na otro paisnan.

    Caracas a laga sa, cu nan tin un lista ainda di como 200.000 Venezolano cu ainda ta na Quito (Ecuador), Lima (Peru), y Santiago (Chile) cu kier regresa nan pais.