Danki na Facebook awor Polisnan Dominicano ta duna boet na chauffeurnan coriendo malo

ORANJESTAD (AAN): Wowo di Polisnan no por ta tur caminda!  Esey ta e idea tras di un campaña nobo cu a start na Republica Dominicana,

unda publico ta graba video y pone riba social media, di chauffeurnan cu ta viola ley di trafico coriendo malo sin respeta reglanan existente.  Nan ta tag Polis y awor Fiscal a cuminza ta duna boet na e doñonan di e auto ey.

   Tur esaki danki na social media.

   E asina yama Direccion General de Seguridad y Transporte Terrestre (Digesett), a pone algun funcionario policial traha riba algun video cu a aparece riba social media, di varios chauffeur cu ta maneha auto na forma roekeloos y ta viola ley riba diferente caminda na e pais di merengue.

   Hendenan cu ta graba e escenanan aki, ta post esaki riba social media manera Facebook, y nan ta tag e departamento di Digesett.  Y awor e departamento ta traha pa asina lesa e plachi di number di e auto, y ta percura pa e doño di auto ta haya boet den su man.

   Diasabra cu a pasa, e departamento aki a publica riba nan social media, tres caso cu nan a logra haya sa kende e chauffeurnan ta cu a viola ley 63-17 di Trafico, y cu a wordo graba door di publico riba nan smartphone, y video poni riba Facebook.  E oficialnan di Digisett a confirma e video, a determina ki ley el a viola, y a percura pa duna nan un multa corespondiente.

   E prome di nan tabata chauffeur di un Autobus cu a dicidi na subi y core riba acera pa asina trata di pasa otro autonan.  E di dos ta un chauffeur di un auto color blauw, cu tabata core na forma roekeloos ta drift y draai rond na velocidad halto cerca di un stacion di gasolin.  E di tercer ta un manehador di motorcycle kende tabata pasa auto riba un ruta unda esey ta prohibi.