Asombroso cu Aruba ta yenando cu turista mientras Cayman Islands ainda ta cera

ORANJESTAD (AAN): Varios isla den Caribe ta notando mas y mas aumento di turista cu ta drentando pa asina disfruta di un vacacion bon mereci, despues di tabata cera den lockdown durante casi henter 2020. 

   Usando tur clase di protocol pa salvaguardia nan ciudadano, y tambe mitiga cualkier brote cu lo por drenta di nobo, varios isla ta ricibiendo turistanan na gran escala atrobe.  Turistanan yegando di Merca y Europa na gran cantidad, ta pone cu placa ta lorando bek y poco-poco economia di e islanan ta cuminza draai bek den nivelnan positivo.

   Hasta barconan crusero ta bishitando varios isla caba y cada siman ta mas barco ta cuminza restart nan viahe.

   Cayman Islands na lock ainda:   Sinembargo, ta increible pa pensa cu e.o. tin isla cu ainda awor na Juli 2021 no a habri nan frontera mes pa turistanan.  Uno di nan ta Cayman Islands, cu ta islanan cu beach masha bunita cu infrastructura di Hotel na cantidad, cu ta situa net un tiki pabao di Jamaica.

   Informacion nobo di Cayman Islands ta cu awor na Juli nan ta kedando cla na formula un plan di 5-Fase pa na un forma safe duna bon bini bek na turistanan.  Esey segun un boletin emiti pa Caribbean Tourism Organization (CTO).

   Desde Maart 2020, Cayman Islands a cera su portanan pa tur hende y bishitantenan.  Y di e tempo ey nan ta trahando riba strategia pa habri bek na turistanan.  Asina a bin cu un Plan di 5-Fase pa habri nan frontera pa pasaheronan internacional.

   Fase-1 na Cayman Islands a start na Juni 2021 caba y a reduci periodo di cuarentena pero toch pasaheronan cu ya ta vacuna, tin di bay 5 dia riba cuarentena.  Pasaheronan no-vacuna tin di bay 14 dia den cuarentena.

   Fase-2 ta cuminza dia 9 di Augustus, unda ta bay flexibiliza mas restriccion di viahe, y negoshinan local tin di cuminza cumpli cu protocolnan avanza di seguridad.

   Fase-3 ta pone fecha 9 di September, como e dia ora Cayman Islands lo cuminza cu introduccion limita di turismo.  Esaki lo socede solamente si 80% di habitantenan di e isla a vacuna, y e turistanan cu ta drenta lo mester ta completamente vacuna.  Ainda nan lo no habri porta pa barconan crusero.

   Fase-4 ta pa dia 14 di October, bay reduci e restriccionnan di cuarentena aun mas, y elimina cuarentena pa pasaheronan cu ta full vacuna.  Pasahero sin vacuna, lo tin di bay cuarentena ainda pa 14 dia.

   Fase-5 lo permiti entrada di muchanan sin vacuna entrante 18 November, aunke lo keda prohibi turismo crusero.  Muchanan sin vacuna (bao 12 aña) lo ser permiti pa viaha cu turistanan adulto vacuna.  Nan lo no exigi cuarentena pa muchanan.  Muchanan riba 12 aña sin vacuna si tin di bay den cuarentena pa 14 dia.

   Despues di tur 5 Fase, e isla di Cayman Islands lo habri porta hancho pa turismo dia 27 Januari 2022, incluyendo turismo crusero.

   Na Aruba ya tin yen turista:  Mientras cu Cayman Islands ta ainda preparando pa habri nan frontera pa turista, otro islanan den Caribe ya caba ta hopi avanza caba y hasta e cantidad di bishitante ta cuminza pone nan yega igual na nivelnan manera antes.  Aruba mes ta un di e islanan cu a habri porta back pa turismo na luna di Juli 2020 caba.  Y tur Taxi cu nan separacion di plexiglas paden, tur hotel cu protocolnan y reglanan sanitario estricto. Y Crisis Team di e isla cu hopi regla con pa atende cu turistanan y testnan cu tin di haci na Aeropuerto.

   Siman pasa mes, y e fin di siman cu ta tras di lomba, por a mira con hopi turista tin na Palm Beach na Aruba.  Nan ta riba beach, y anochi tambe riba e strip di Restaurant, Bars, y Lounge ta disfruta di nan mes.

   E ta demostra cu despues di 15 luna cu e crisis a start, ya Aruba tabatin tur cos planea pa recupera y start bek economia di e isla.  Hopi tabata duda cu e lo tarda, pero awor por mira cu ya caba bishitantenan a bin bek na Aruba.

   Hotel cu 100% ocupacion: E hotel local di Hilton Hotel Aruba Caribbean Resort riba dos siman pasa Diabierna, a celebra e hecho cu nan a yega 100% di ocupacion bek.  Segun gerencia di Hilton, esaki a tuma lugar den un fase di recuperacion mas rapido cu a worde premira. Un tremendo sentimento pa e resort su empleadonan y miembronan di team, cu hopi gana di yama bon bini atrobe na nos bishitantenan, na nan hogar leu for di cas.

   DIARIO a mira cu Hilton Aruba a celebra e 100% aki door di laga traha cupcakes, y e gerente general mes a bay tras di grill pa asina prepara un barbecue di Piri Piri Chicken y Grilled Ribs pa empleadonan.  A compronde cu gerente general Vasco V. Baselli a haci esaki un tradicion pa cushina pa e miembronan di e team riba ocasionnan special, anto e proyeccion di 100% recuperacion ta sigur un di nan.  Empleadonan a disfruta di nan almuerzo na nan cafeteria, sintiendo un satisfaccion enorme den cuadro cu e regreso di capacidad completo mientras cu cifranan di occupacion pa futuro ta permanece di ta hopi positivo.

   Nan a splica DIARIO, cu Hilton Aruba a logra mantene tur nan miembronan di team y empleadonan durante e pandemia.  Riba potret por mira e lunch di aprecio na empleadonan, cual a worde organiza den e cafetaria.