Trabao sobrehumano na Setar NV pa a fix e destruccion di wayanan Fiber Optic

ORANJESTAD (AAN): For di Diabierna mainta cu e proceso a start, finalmente a keda cla te Diadomingo madruga cu e trabao, y awor tur compania y area cu ta riba e red di Fiber Optic, ta trahando bek.

   Cada waya tin como 100 fibra fini di fibra optico, y pa bo weld esaki (pega esaki na otro), e ta un proceso hopi caro y complica, como cu bo mester tin equipo y machine specializa pa haci esey.  Algun hende ta referi na e tipo di welding aki como ‘arc fusion splicer’.  E ta hopi mas dificil cu djis soldeer wayanan di koper na otro.

   E team di Setar NV a logra di isola trempan caba kico ta e wayanan cu tabata bayendo pa Aruba Bank NV, pa asina purba di pone nan online prome.  Sikiera asina cu e speranza cu trahadornan na Aruba lo por haya nan payroll.

   Lamentablemente pa gran parti di hende na Aruba, esey no a socede.  Hopi trahador mes a pasa un weekend sin salario, y tin di bay warda te awe Dialuna pa mira si acaso nan salario lo bay pasa, como cu e proceso pa transferencia tin di bay start full di nobo.  Pero ya caba varios banco a cuminza procesa algun standing orders, y a haya cuentanan bashi.  Aki sigur hopi banco lo bay cobra 25 Florin bay goal di multa pa ‘insufficient funds’.  Algo cu ta bay cay masha duro mes riba e lomba di clase trahador.

   Mientras tanto, e speranza tey cu autoridad lo por haya sa ta kende(nan) a comete e acto aki.  Den fin di siman oficialmente Polis no a duna ningun relato di kico exacto a socede, pues no sa ainda den ki direccion e investigacion ta bayendo.

   Pa Diadomingo merdia, ya caba full e area banda di rotonde di Sero Blanco a keda full tapa bek cu santo.  Danki na trahadornan di Setar NV cu a sa di haci e milagro aki di conecta tur hende bek, den record di tempo pa un trabao hopi dificil.