Tour Operadornan Ingles a bin bishita Aruba

ORANJESTAD (AAN): E vuelonan di British Airways ta crea oportunidadnan nobo pa Aruba den e mercado Europeo.

  British Airways lo ta bendiendo vuelo pa Aruba pero tambe lo ta bendiendo paketenan a traves di British Airways Holidays y otro tour operadornan. Esaki ta habri portanan nobo ya cu a traves di nan Aruba tin oportunidad pa yega na otro clientenan tambe.

  Riba e vuelo inaugural dia 26 di maart tabata tin un grupo di tour operador cu a bin di Inglatera pa conoce Aruba como parti di un biahe di familiarisacion (FAM trip), hunto cu representante di British Airways y A.T.A. E tipo di biahenan di familiarisacion aki ta crea un oportunidad pa operadornan por absorbe mas di Aruba como destinacion pero tambe pa por comparti di nan experiencia propio cu nan clientenan.

   Participantenan a keda algun dia na Tamarijn All Inclusive y algun dia na Renaissance Wind Creek Aruba Resort pa asina experencia diferente area y diferente producto hotelero. A pasa bishita tambe Boardwalk Boutique Hotel, Ritz Carlton Aruba, Hilton Aruba Caribbean Resort & Casino, Manchebo Beach Resort & Spa, Embassy Suites Aruba, Aruba Marriott Resort & Stellaris Casino, Bucuti & Tara Beach Resort, Hyatt Regency Aruba Resort Spa & Casino, Amsterdam Manor Beach Resort y Aruba Ocean Villas. Tambe nan a haci un tour pa conoce diferente area di Aruba y un trip riba catamaran hunto cu De Palm Tours.

   A.T.A. ta agradecido na tur socio y miembro di ekipo cu a haci e biahe di e operadornan di Inglatera uno inolvidable.