Explosion den Transformator Huis na Ponton a laga algun area 10 ora sin coriente

Diamars anochi den calor

• Trabao grandi henter marduga pa cambia full un sistema di trafo
• Coriente pa tur area a bin full bek te 5:10 am 

ORANJESTAD (AAN): E anochi di diferente ciudadano no tabata loke nan a spera di bay pasa aden.  Un situacion dificil a produci su mes Diamars anochi banda di 8:05 pm, ora cu diripiente un area basta grandi rond di Ponton a keda sin coriente.  E coriente a bay, bin bek den menos di 1 seconde, y despues bay completamente.

   Resultado di esaki ta cu varios caya den Paradijswijk, Santa Helenastraat, Tanki Flip y Ponton a keda den scuridad.  Parti grandi di como 1,2 km di Watty Vos Boulevard tambe a keda den scuridad, incluyendo e rotonde na Ponton.  Un banda di e rotonde tin luz, y e otro banda ta den scuridad.

   E anochi aki por a mira varios Truck di NV Elmar ta mobilizando rumbo pa Ponton pa check kico ta pasa.  Un tecnico a bin descubri equiponan grandi kibra den un Transformator Huis cu tin riba caminda di Ponton pa Tanki Flip, net banda di Supermarket.

   Un storing inespera a causa cu equiponan instala a ricibi posiblemente un overload, y tabatin explosion debi na esaki.  Pero e no a produci ningun candela, como cu mas bien coriente a cay afo mesora.

   Esaki a pone cu fuse di hopi area di tension halto den vecindario a wordo corta.  Pesey a isola e problema aki, y a dicidi na pone coriente bek den e areanan mas leu.  Ya caba pa 8:36 pm, NV Elmar a cuminsa restablece suministro di coriente den e area di Paradijswijk.

   Pa 9:39 pm nan a logra restablece e suministro di coriente den mayoria area afecta, incluyendo Tanki Flip, y un parti di Ponton.

   Pero e parti principal di Ponton net den cercania di e Transformator Huis a keda scur.  Segun NV Elmar, no obstante tur esfuerzo haci, no a logra restablece suministro di coriente den e parti aki di Ponton cu ta keda net na e rotonde bay nort.

   E trabao den e Transformator Huis tabata mas complica di loke a spera.  Mester a yama varios tecnico mas pa acudi eynan, y Elmar a habri warehouse pa asina saca equipo necesario pa haci e trabao aki, incluyendo generator pa pone luz y haci e trabao mihor.

   E trabao di saca e equipo bieu, y busca equipo cu ta similar di capacidad pa instala.  Mester a haci algun ahustacion pa e equipo nobo por haya espacio dene Transformator Huis aki.  Despues di a logra pone esaki, ta rek e conexion internamente den e casita aki.

   Pero prome cu ta pone coriente bek riba e equipo aki, tin di keur e instalacion completamente prome.  Ora cu e keurmeester keda satisfecho, e ora numa ta duna OK pa personal di NV Elmar por conecta coriente riba dje.

   Di e forma ey, despues di mas di 10 ora den scuridad, pa 5:12 am, e suministro di coriente a ser restableci den e area aki.

   E compania a splica despues cu nan ta hopi consciente di e incomodidad cu esaki por a causa, y ta pidi clientenan pa compronde cu esaki tabata un situacion imprevisto.

   Pa awor, nan lo sigui vigila e situacion y aprecia comprension di tur cliente.

   DIARIO kier a duna danki na e personal incansable di NV Elmar cu a keda traha asina hopi pa asina enfrenta e situacion dificil, y traha riba dje cu tur sudor riba nan frenta, pa asina na final logra mira alivio ora cu e bario a haya coriente bek.

   Riba e potret por mira con mitar di e viaducto riba Hato so tabata ilumina, y ta parce cu ora bo pasa riba dje, e automobilista ta yegando final di e brug.  Tambe por mira e rotonde di Ponton completamente scur.