Tormenta Tropical Fred a inunda varios parti na Santo Domingo

SANTO DOMINGO: Riba Diaranson merdia, Tormenta Tropical Fred a pasa cu su centro hopi cerca di ciudad di Santo Domingo cu awacero torencial cu hopi biento tambe.

  Esaki a causa caos no djis pa trafico, pero tambe algun lugar na e ciudad cu casi nunca ta topa cu problemanan asina.

    Tur caso den Corte cu tabatin na Palacio di Husticia na Ciudad Nueva a wordo suspendi debi cu e awanan den e area a cuminza subi, y drenta e edificio.  Tambe awa tabata drenta via bentana, y empleadonan a wordo manda cas.

   Pero personal di mantenimento e ora a cuminza haci trabao di saca awa, y proteha documentonan pa asina nan no daña door di awa cu a cuminza plama tur caminda eyden.  Awa tabata leak di plafon na varios piso.

   Alcalde di Santo Domingo a dicidi na cera e Malecón di Santo Domingo tambe, esta avenida George Washington, como medida preventivo ora cu awaceronan a bira mas pisa, y biento tabata azota e area.

   Varios ciudadano cu a pensa cu kizas ta djis un maltempo regular esaki ta, a haya nan ta core busca refugio ora cu a nota cu e centro di e Tormenta a pasa hopi cerca, y azota nan cu biento cu tabata yega 75 km/h cu algun rafaga mas fuerte.

   E bientonan aki a pone cu hopi palo di mata grandi a wordo benta abao.  E Plaza San Anton cu ta situa na Ciudad Colonial, casi no por pasa mas riba dje como cu mayoria di palo grandi di mata a sali cay debi na e biento y awacero.

   Un di e palonan cu a cay ta grandi, y el a benta abao palonan di luz y waya tambe.

   Awacero fuerte a azota e areanan di costa zuidoost di Republica Dominicana, esta La Romana, Boca Chica, San Pedro de Macoris, Villa Altagracia, Monseñor Nouel, y e partinan di La Vega.

   Gobierno Dominicano a adverti tambe, cu semper hopi awacero tin e tendencia di aumenta e malesanan tropical manera Dengue, Leptospirosis, Malaria, y awor tambe por hisa e cantidad di caso di Covid-19, net awor cu e pais tin un positivity rate abao di 8.15%.

   Republica Dominicana pa suerte tin un draaiboek yama “Guia Operacional Temporadas de Huracanes-Covid”, cu a wordo traha pa Centro di Operacionnan di Emergencia (COE), cu ta inclui e plan di kico autoridadnan tin di haci, y tambe kico famianan tin di haci pa preveni mas contagio di malesa.

   E draaiboek aki ta indica cu famianan tin di prepara un ‘Plan di Proteccion’ den caso di inundacion y di Covid-19.  Cuminda mester wordo bon cushina (nada curu), awa di bebe mester ta potable, y si acaso nan mester bandona nan cas debi na inundacion, e ora tin di keda mantene distanciamento fisico y semper usa tapaboca.

   Nan tin di sali cu un maleta of bulto, den cual tin di pone remedinan cu ta yuda si bo ta sufri di un malesa, manera presion halto, diabetes, of cualkier otro, y tambe remedi pa baha keintura of dolor, y tambe desinfectante di herida.

   Ora cu awacero stop, y nivel di awa baha, ta recomendable pa bo haci cas bon limpi y evita di mishi cu awa contamina.  Corda cu inundacion ta contene awa di poz tambe.  Si bo tin un herida, corda mantene limpi pa e no haya infeccion.

   Si nan hibabo den un shelter, corda cu bo tin di tapa nanishi y boca ora di tosa of niester, y cumpli cu e reglanan di e shelter pa cu e uso di tapaboca.  Si ta posible, evita di comparti cuminda y bebida cu otro hende.