ORANJESTAD (AAN) – Cas di Cultura Aruba a convoca un conferencia di prensa, relaciona cu e concierto “Un canto pa mi tera”,
cu lo tuma lugar e den Cas di Cultura e dianan 25, 26 y 27 di Augustus aki, cual ta priminti di ta un concierto espectacular.
Candy Reino Rasmijn, Vicky Arends, Stanley Dabian, Lotte van der Heuvel, Diana Anthonette y e cantante Angela Croes, a duna informacion.
Candy Rasmijn a cuminza indicando cu aña pasa nan a traha riba e proyecto y a pone dos fecha pe, pero lamentablemente, door di e pandemia a wordo cancela.
Director di Cas di Cultura, Vicky Arends, seguidamente a hiba palabra indicando cu nan ta contento cu e concierto aki lo bay tuma lugar e aña aki si, y nan ta trahando hopi duro pa esaki.
Arends a pidi tur persona cu ta bishita Cas di Cultura pa eventonan pa nan bisti nan tapaboca durante e concierto aki, pa e publico tambe ta responsable den e situacion cu nos tin di pandemia.
Tambe pa e artistanan keda safe pa por realiza e evento aki, y responsablemente nan por sali hunto pasa un tempo ameno den momentonan cu no ta asina agradable.
El a duna di conoce cu e cantante Angela Croes lo tin su presentacion dia 26 y 27 di Augustus aki, pa 7 or di anochi. “Ta bay tin un concierto espectacular, visual, musical, ameno, caluroso, y cu guestnan di Spaña cu ta profesional den nan veld di Flamenco. Kiermen, nos ta hopi excita pa esaki”, Vicky Arends a expresa.
El a agrega cu scolnan tambe lo tin oportunidad di presencia e show aki. E fechanan ta dia 25, 26 y 27 di Augustus aki.
“Nos sa cu scol ta cuminza otro siman, pero uza esaki como oportunidad pa cu boso muchanan bin pasa un mainta ameno. E lectura educacional aki ta un ora, pues laga nos sa si bo kier bishita cu bo scol pa nos acomoda esey. Si grupo di mayor por bin yuda cu transportacion lo ta fantastico pasobra e budget pa busnan ta hopi halto. Pero semper tin solucion. Desde scol basico te cu middelbare scolnan, colegio EPI y Universidad di Aruba, tur ta invita, pa conhuntamente cu nan alumnonan bin akinan, sea 25, 26 of 27 di Augustus”, Candy Rasmijn a duna di conoce.
Por cumpra carchi cerca Lotte van den Heuvel, pero pa scolnan e evento ta gratis!
Vicky Arends ta spera cu hopi hende colabora pa bin apoya nos artistanan local y wak un presentacion cu un aire internacional tambe, cu ta garantiza un anochi hopi bunita. El a reitera pa no lubida di bisti tapaboca.
