Wega cu reconteo ta confirma e balor cu Pueblo di Aruba tin pa AVP -- *Investigacion oficial mester revela e portretnan di formularionan di voto - *Den Sala di Corte ya caso di registro di voto a duna prueba di dictatura AVP
ORANJESTAD(AAN)—Cu AVP ta capaz di tur cos, a bini dilanti na tur forma. Cu manipulacion di votadornan, ta e arte den cual dirigentenan di AVP ta destaca, sigur ta bini dilanti. Cu pa AVP, e dolor di Pueblo no ta relevante sigur a bini dilanti den e gobernacion di uno di e gobiernonan cu a bati record den Reino pa loke ta trata abuso di Pueblo.
Na 2020 Aruba a cuminsa cu su lucha contra di morto. Un lucha contra un pandemia cu a herida Pueblo di Aruba cu a perde tur su entrada.
Den e situacion aki, Aruba mester a lucha cu un caha di placa cu AVP a laga atras yena cu documentonan cu ta confirma debe cu e partido a crea pa e Arubiano. Den e situacion aki Aruba mester a sigui cana mientras scandal tabata rementa cada rato pa confirma e calidad di Gobierno cu AVP tabata pa Aruba.
Na 2021 berguensa ta cubri cara di Aruba cu mester a mira con un homber a bandona prison a base di libertad condicional, loke ta nifica cu e por regresa prison ora su caso bay dilanti di Huez.
Benny Sevinger a bira e prueba mas grandi di AVP pa loke ta trata sentimento pa Pueblo cu mester guli un situacion den Parlamento, caminda berguensa a caba. Despues di presencia di Benny Sevinger den Parlamento no por papia mas di integridad di representacion di Pueblo, mientras cu proximamente Corte di Husticia mester determina futuro di Paul Croes, cu a wordo sentencia pa asuntonan di permiso, pero a dicidi di apela su caso.
Ministerio Publico mester studia e rapport cu ta splica kico a pasa cu Refineria di Aruba na man di AVP, cu a gana eleccion na 2009 despues cu e caso Fondo Desaroyo Nobo San Nicolas, a caba riba beach di Aruba.
Mientras Aruba ta lucha contra un pandemia cu ta costo e pais placa, AVP cu a percura pa Aruba keda sin placa pa motibo di e forma cu Mike Eman a destrui e base financiero di Aruba, a percura pa na 2021 e partido duna prueba di e balor cu Aruba tin pa AVP.
Despues di a sconde pa Pueblo durante cuatro aña, destructor di Aruba Mike Eman a aparece atrobe sin ningun tipo di berguensa pa loke el a haci cu e pais.
Mike Eman no a ofrece Aruba un excusa pa e hecho cu el a hinca Aruba den man di supervision Hulandes ni cu el a destrui e economia di Aruba cu su wega di fantasia di Citgo hunto cu Nicolas Maduro.
Prueba a wordo duna di e nivel di Mike Eman y AVP, ora a bay contra votacion cu machine y a crea e imagen cu Conseho Electoral kier comete fraude na urna electoral.
Gobierno di Aruba a dicidi cu ta keda cu e sistema di vota riba papel. Prome cu AVP a uza vota riba papel pa otro wega, den Corte di Husticia Pueblo di Aruba a haya e prueba con AVP ta atende cu votadornan y e presion cu tabata pone riba votador. Ora Gobierno Wever-Croes a dicidi cu partidonan politico no ta haya registro di votadornan, e caso a bay Huez, caminda a bini dilanti cu AVP tabata uza e registronan aki pa bay busca hende cu no kier a bay vota te na nan cas, pa asina nan bay vota.
Algo cu Huez mes no por a acepta y cu claramente ta contra ley di eleccion.
Awe Huez ta bolbe splica den sala di Corte cu e no por uza e formularionan di voto secreto cu awor ta riba portret cu AVP a uza pa exigi un reconteo di voto pasobra AVP kier un asiento mas.
Huez a rechasa acusacionnan di AVP, cu awor den pleno pandemia, lo kier sigui cu apelacion di su caso.
Nos pregunta ta keda: kende a entrega e portretnan di formulario di voto na AVP? Con por ta posibel cu resultado di eleccion secreto, manera Huez a mustra ta bini dilanti den sala di Corte? Cuanto tempo mas e formularionan di voto lo keda sin wordo destrui?
Un investigacion mester wordo haci di e portretnan cu a bandona e luganan caminda tabata haci conteo secreto di voto pa asina duna contenido na e leynan cu ta regla eleccion secreto na Aruba, cu no ta acepta dictadura.
Den pleno pandemia, AVP ta den centro di atencion atrobe. Cu escandalo. Cu exigencianan na fabor di AVP, cu tur dia ta laga un mensahe cla pa Aruba: politica mester sirbi interes di AVP, cu a cubri Aruba cu berguensa!
