Tin establecimentonan cu ta keda sigui exigi medidanan y mester cumpli cu esaki

ORANJESTAD (AAN) – Den conferencia di prensa di gobierno, Diaranzon mainta,

Minister Presidente Evelyn Wever-Croes a anuncia cu entrante awe, Diahuebs 17 di Februari 2022, tur medida tocante covid-19 ta keda cancela cu algun excepcion cu el a menciona.

Medidanan cu ta keda vigente ta testmento pa drenta Aruba. Esaki kiermen, cu tur hende cu ta bin di exterior mester haci un test ora cu nan drenta, of si nan ta vacuna completamente, no tin nodi di test.

Nos residentenan local por test aki na Aruba ora nan drenta, y mester tene cuenta cu e vacunacion mester ta completo pa e adultonan, inclui e booster.

E dignatario a reitera cu e centro di vacunacion na Santa Cruz a cera diaranzon 16 awo, y entrante e mesun dia aki por vacuna na DVG, manera e procedure regular, y via e unidad movil cu aworaki ta den Centro di Bario Playa Pabao na unda por haya sea e prome, di dos of di tres shot.

Tur demas medida ta keda cancela. “Pues, horario di ciere di tur establecimento ta bay bek na esun cu tin riba nan permiso. Cantidad di hendenan na mesa no ta wordo limita mas, y tur e demas medidanan den comercio, casnan di cuido, scol, etc., ta wordo cancela, pero tin algun recomendacion si. Y no ta recomendacionnan liviano, cu nos ta urgi cada ciudadano pa por fabor atene na e recomendacionnan aki.

E prome, ta laba man frecuentemente. Esaki ta e arma di mas poderoso pa nos combati e enemigo aki di covid-19.  Tambe tene distancia social di 1.5 meter mas tanto cu ta posible; sigui uza bo tapaboca ora bo ta haya cu ta necesario, si bo ta paden, si bo ta den hopi hende cu bo no ta frecuenta, tambe percura pa bo por tin bon ventilacion, pa semper tin aire fresco caminda cu bo ta, si ta lugar cera percura pa bo por ventila regularmente, tuma bo vacuna of e booster shot, sigui haci uso di self test, y si bo tin sintoma keda paden inmediatamente. Haci bo test pa bo sa kico ta kico”, Minister Presidente a señala.

E dignatario a menciona cu gobierno tin un maneho di cuarentena y isolacion ainda. E mandatario a splica cu tin establecimentonan cu ta keda exigi medidanan y mester cumpli cu esaki si kier drenta den e establecimentonan aki.

Prome Minister a subraya cu tur esaki ta den linea cu e strategia di salida cu gobierno a papia di dje luna pasa y cu dos siman pasa ya caba el a cuminza elabora riba dje. “Mescos cu mi a bisa den mi ultimo conferencia di prensa, cu gobierno ta stop di cuida bo cu e medidanan aki; nos como gobierno ta hala atras pa abo cuida bo mes y cuida bo famia”, Minister Presidente a remarca, agregando si, cu ta responsabilidad di un y tur pa sigui proteha esnan mas vulnerable den nos comunidad.