ORANJESTAD (AAN) – Diaranzon mainta a tuma lugar e conferencia di prensa di fraccion di Partido Movimento Electoral di Pueblo (MEP), Parlamentario Hendrik Tevreden a hiba palabra.
Tevreden a enfoca riba dos tema; esun prome ta e Landspakket y di dos e bishita na Parlamento di e Secretario di Estado di Hulanda, señora van Huffelen.
Miembronan di Parlamento ta masha contento cu e bishita di señora Huffelen, pasobra contrario na su antecesor, señor Knops, Parlamento nunca tabata tin e contacto cune di cerca, manera nan ta premira cu awo ta bay ta e caso cu e Secretario di Estado actual.
Tevreden a menciona cu Dialuna di e siman aki, den Parlamento, nan tabata tin presentacion di Minister Wever, tocante e Landspakket, riba e parti economico, con pa start y pusha e economia di Aruba, y parlamento tabata contento di scucha locual cu e mandatario a presenta. E rol cu Parlamento tin den esaki ta e parti legislativo y pesey, fraccion di MEP a dicidi pa pidi tur e ministernan pa bin Parlamento, y duna informacion tocante e doorlichting rapport cu ta andando, pa nan por ta na haltura y pa nan tambe por bishita e stakeholders si tin mester, pa na momento di adresa ley, e ta mucho mas facil y comprendible pa evita mal entendimento cu por tin riba esaki.
Den e presentacion cu nan a ricibi den Parlamento, Parlamentario Tevreden a ser conoci, y a subraya, e parti cu ta regarda tanto e macro como e micro economia.
E micro-economia ta esun cu ta regarda hende cu, por ehemplo, ta bende bolo, frio, etc., y e kier mira tambe e ciudadanonan aki den e reforma cu ta bin, pa nan tambe haya e crecemento y atencion necesario pa nan, como empresarionan chikito, cu na opinion di e parlamentario esaki ta loke falta pa nan. E kier pa nan tambe haya e oportunidad y chens pa crece nan empresa, hacie mas grandi, hisa nan nivel di benta, y asina ey yega na un nivel unda cu nan por continua na sostene nan famia y realiza locual cu nan ta haci.
Tevreden ta considera importante pa inclui tur esaki den e reformanan economico, pa cuminza, pasobra e entrada di ganashi y e progreso, mester wordo reparti for di ariba te cu abao, na un manera unda cu henter pueblo ta crece y sali for di e pandemia aki, cu hopi forza.
Tevreden a splica cu esaki ta e parti cu el a presenta pasobra e ta kere cu e bolo mester wordo parti pa un y tur den comunidad, y el a wordo bon ricibi pa Minister Wever, y el a splica cu esaki ta locual nan ta haciendo, y a cuminza cu sondeo y investigacion riba e parti aki y aspectonan cu ta bay straight riba, por ehemplo, educacion pa e muchanan cuminza siña for di trempan na scol cosnan manera “budgetering” cu ta cosnan simple cu no por imagina cu tin un impacto grandi, pa ora e hoben ta madura y tambe nos comunidad ora di bay den e parti di ta empresario.
Otro aspecto cu Parlamentario Tevreden a menciona, ta cu seguidamente na e conferencia di prensa aki tabata tin un reunion cu señora van Huffelen y e ta haya cu ta bon pa apunta tambe e recorte di 12.6% di salario di empleadonan publico.
