Stichting Club Kibrahacha a celebra su di 36 aña di existencia

ORANJESTAD (AAN)—Stichting Club Kibrahacha a celebra di su 36 aña di existencia.

Señor Jeffrey Matos, director, den un entrevista cu DIARIO a splica cu aña pasa no por a celebra nan di 35 aniversario, pero e aña aki si nan a dicidi di haci algo, aunke no un fiesta grandi manera nan lo a desea.

Durante e celebracion e fundacion a introduci su logo nobo, y tambe nan a update nan website. Tambe a reconoce un boluntario, cu a traha durante 35 aña. E dama su nomber ta Irene Robles de Medina y e tin 95 aña di edad. Minister Presidente Evelyn Wever-Croes a entrega e pin na señora Medina.

Nan a entrega na señora Robles de Medina e prome pin di Eric D’Arnault, cu ta e fundador di e Club. Jeffrey Matos a expresa cu nan ta hopi orguyoso di esey, aunke nan a haci un celebracion adapta, fuera di lo normal, pero en todo caso nan ta den conexion cu nos comunidad.

Matos a agrega cu e Fundacion, e ultimo añanan, a haci hopi cambio y nan kier sigui innova, adapta nan programanan na e necesidad di nos grandinan cu ta bishita nan actividadnan y e personanan cu ta baha cu pension.

E director, señor Matos a menciona cu desde cu covid a drenta Aruba, Club Kibrahacha a adapta su programanan y a percura pa tin protocolnan estricto pasobra nan tin cu cuida nos grandinan.

“Nos no a scoge pa bisa pa nan no bin mas, pa nan keda den cas, pero a scoge pa continua cu e actividadnan y mi ta kere cu exitosamente.  No mes grandi cu antes”, Matos a reitera.

Awo e grandinan ta bin un bez pa siman y no dos of tres bez manera prome, pero poco, poco nan ta amplia nan actividadnan y adapta nan na e caso. Jeffrey Matos a acentua cu e transporte pa e grandinan ta hopi importante pa e fundacion y tambe tin actividadnan riba Diasabra, manera nan les di cuarta y cursonan tocante salud. El a enfatiza cu Club Kibrahacha ta adapta su programa di manera cu por haya participacion di nos grandinan.