Squadron di Rotacion 51 di Defensa a entrega su tareanan na Rotacion 52

Durante un ceremonia militar na Corsou

ORANJESTAD (AAN): Riba dialuna, 13 di juli 2026, e squadron di Rotacion 51 di Defensa a entrega su tareanan na Rotacion 52 durante un ceremonia militar na Corsou. Capitan Luc a asumi mando for di Capitan Marnix durante e ceremonia tradicional di traspaso di mando. E unidad lo entrena y opera den e region di Caribe durante e siguiente seis luna.

-Mirando bek riba un periodo intensivo

Despues di casi cinco luna den Caribe, Capitan Marnix ta wak bek cu orguyo riba e desaroyo di e Squadron Bravo/Stier. Durante e periodo aki, e unidad a realisa entrenamento amplio riba Corsou, Bonaire, y Aruba, como tambe na Merca. E soldatnan a traha riba nan desaroyo fisico y mental, liderazgo y habilidadnan militar.

Pa medio di varios ehercicio, e compania a haci progresonan den su rendimento como un unidad di combate. E pilotonnan a ehecuta multipel mision, sostene pa activonan manera francotirador, patruya y sistemanan no tripula. E actividadnan di entrenamento aki a contribui na e desaroyo continuo di e soldatnan y e preparacion operacional di e unidad.

Tambe e squadron a colabora cu militarnan di Caribe (CARMIL) y otro unidadnan bao di Comandante di Forsanan Naval den Region Caribe (CZMCARIB). A pesar di diferencianan den antecedente y metodonan di trabao, nan a entrena hunto y a traha pa garantisa seguridad y stabilidad den e parti Caribense di Reino.

-Squadron nobo ta cuminsa despliegue den Caribe

E Squadron Delta/Ratel di e 44 Batayon di Infanteria Blinda ( Regimento Infanteria Prins Johan Willem Friso) ta participando pa prome biaha den un rotation Caribense. Capitan Luc ta ansioso pa e periodo benidero y e oportunidadnan pa su unidad trein den un clima y diferente tereno.

E squadron ta forma parti di e di 43 Brigada Mekanisa cu sede na Havelte. E unidad normalmente ta opera uzando e vehiculo ‘Fennek’. Durante su despliegue den Caribe, sinembargo, e enfasis ta primordialmente riba operacionnan  na pia. E squadron  ta wordo reforsa cu capacidadnan medico di e di 43 Squadron Medico y capacidadnan spesialisa di e di 11 Batayon Blinda di Ingeniero.

Ademas di ehecuta misionnan pa CZMCARIB, e unidad ta traha riba su propio programa di entrenamento. E meta ta pa sigui mehora e preparacion operacional y prepara pa desplieguenan den futuro.

Ehercito Real di Hulanda tin permanentemente presencia di un squadron den Region Caribe. Cuminsando cu rotacion 2026-2, un despliegue ta dura seis luna. Esaki ta reduci e peso logistico y ta permiti e unidad mas tempo pa colabora cu partnernan local y compronde miho e ambiente local. E squadron  por wordo desplega pa diferente tarea bao di encargo di CZMCARIB y lo ta entrenando riba Aruba, Bonaire, y Corsou durante e siguiente lunanan.