Secretario General di SEPPA a pidi un solucion pa Arubus mas tarda Diabierna atardi

A entrega un carta na Minister Arends den nomber di trahadornan di Arubus

*En caso cu no logra e pasonan cu lo tuma ta escala 

ORANJESTAD (AAN)—Sindicato SEPPA y Minister Ursell Arends, tambe titular di Transporter Publico, a topa otro dilanti Bestuurskantor, unda cu Magaly Brito, Secretario General di SEPPA, a dirigi su mes na e mandatario, den nomber di e trahadornan di Arubus.

            Magaly Brito a bisa e mandatario cu e trayectoria largo di lucha cu e trahadornan di Arubus ta hibando, pa yega na un acuerdo husto y digno di salario, p’asina nan tambe por sobrebibi.

            Brito a señala cu costo di bida y prijs di productonan ta pisa hopi den e cartera di e trahadornan aki, pero tambe den e biba di tur dia. “Nan situacion cada dia ta keda bay mas atras, y esey ta haci cu e discusion riba e tema salarial tambe a bin ta tardando. Pa e motibo aki nos ta para aki dilanti cu peticion pa gobierno, na Minister, cu ta representa e compania di pueblo aki p’asina pone mas fondo necesario pa yega na un acuerdo”, Brito a comunica na e mandatario.

            El a agrega cu aunke sea un acuerdo na e momentonan aki, cu ta calma e situacion, pero cu ta permiti nan tambe pa sigui brinda e servicio di calidad y eficiente.

            “Na e momentonan aki, e situacion cu nan ta aden ta imposible pa sigui labora den un ambiente trankil; al contrario, tin hopi frustracion, demotivacion, pa e temanan aki cu mi ta tratando”, Brito a bisa.

            Magaly Brito a referi na un carta cu e minister a dirigi na SEPPA y tambe na Mediador, unda e ta bisa cu e discusion aki mester wordo hiba cu e empleador, pero na mesun momento e empleador na mesa a bisa cu si gobierno, of den e caso aki e minister, no pone fondo necesario na mesa, lo ta imposible pa yega na un acuerdo.

            “Pa e motibo ey, mi ta kere ta mas cu comprendible cu un biaha mas nos ta akinan. Nos a bin na varios ocasion, nos sa cu minister tabata tin tur intencion pa yega na un entendimento. Esaki a wordo para, pero di otro banda, si nos sigui di e forma aki, minister, nos lo keda riba caya, nos lo keda den protesta, e trahadornan aki lo sigui riba e lucha pa yega na un miho ahuste di salario, na miho entrada, p’asina nan por biba un bida digno, tambe pa nan famia, percura p’esey y sobrebibi den e temponan aki caminda cu placa no ta yegando y bin cambionan den salario ta birando cada dia mas imposible” Magaly Brito a remarca.

            Seguidamente Brito a entrega e carta na Minister Arends, den nomber di e trahadornan y a reitera cu nan tin confianza cu señor Minister lo haci tur posible, pa den corto plazo por yega na un acuerdo.

            “Nos ta pidi si, pa nos tin un reaccion positivo, no mas tarda cu Diabierna atardi. Si nos no por yega na un solucion, lastimamente nos tin cu escala e pasonan cu mester wordo tuma, p’asina trahadornan di Arubus por haya oido y tambe solucion pa e preocupacion grandi cu nan tin na e momento aki”, Magaly Brito a expresa na Minister Arends.