Durante e Conferencia 'Dutch Caribbean Agriculture Livestock 2024' e islanan a siña hopi di otro

Natalie Maduro, Director di LVV:

ORANJESTAD (AAN) – Directora di Departamento di Agricultura, Cria y Pesca (Santa Rosa), Natalie Maduro, den entrevista cu DIARIO a elabora tocante e Conferencia 'Dutch Caribbean Agriculture Livestock 2024', cu a tuma lugar di 26 di Mei pa 1 Juni ultimo, den cual Aruba a manda su delegacion, encabeza pa su persona.

            Esaki ta den e contexto di cooperacion cu tin riba tereno di agricultura, entre e seis Islanan Hulandes BES (Bonaire, Eustatius, Saba) y CAS (Curacao, Aruba y Sint Maarten), cu miras na seguridad alimenticio, entre e “Dutch Caribbean Islands” aki.

            El a menciona cu e cooperacion entre e Islanan a cuminza na Curacao na aña 2022, cu nan tabata tin e “Visioning Process Conference” unda cu e seis islanan a bin hunto. E ta corda cu aña pasa nan a firma e MOU entre e seis islanan y e aña aki, e conferencia a tuma lugar na Sint Eustatius unda cu nan a bishita SABA pa un dia.

            “Nos a siña hopi di e otro Islanan y por wak cu e fortaleza cu nan tin na St. Eustatius ta nan suelo cu ta volcanic, cu nan por produci hopi. Nan populacion ta hopi abao, y esey ta un reto cu nan tin pasobra nan por produci hopi berdura, pero nan no por tin e demanda pa tur e produccion cu nan tin”, Natalie Maduro a subraya.

            Nan a bishita SABA pa un dia, y eynan apesar cu e ta un Isla hopi chikito y cu e ta gewoon un volcan, nan ta haciendo estudionan riba sistemanan hydroponic, manera Aruba tabata haci algun aña pasa, pero den sistemanan hopi mas chikito.

            Algo cu pa e grupo,  pero vooral pa Natalie Maduro tabata impresionante, ta wak e sector di pesca di SABA. SABA ta exporta lobster pa Sint Maarten y Sint Eustatius.

            “E cantidad di lobster cu nan tin den nan areanan di pesca, ta hopi grandi, y por wak si cu e cantidad di piscado ta menos cu Aruba, pero nan ta hopi structura. Pues, locual nan ta splica nos ta cu nan tin hopi producto, pero lamentablemente nan tambe pa loke ta e parti di transporte, tin ora e aspecto legislativo, pues e leynan cu tin no ta laga nan exporta mas leu cu Sint Maarten”, Natalie Maduro a indica.

            El a menciona tambe cu pa loke ta Sint Eustatius nan a wak cu eynan calco tambe ta un producto cu ta wordo pisca, e piscadonan ta conciente di hacie na un manera responsable, y e parti bunita ta cu nan ta traha hunto.