Aruba ta bay conta cu e ‘Operation Command Center’ miho ekipa y mas moderno den region

Parlamentario Darlaine Guedez-Erasmus:

ORANJESTAD (AAN): Parlamentario di Fraccion di MEP, Darlaine Guedez-Erasmus ta elogia e proyecto di ‘Operation Command Center’ cu lo ta situa na Savaneta, den e ex-edificio di polis, cu ta bezig ta remodela.

E commando aki lo tin tres funcionalidad cu ta bin hunto centralisa.  Aki lo bin e ‘centrale meldkamer’ (central di polis), ‘radar kamer’ y e ‘camera surveillance’.

Guedez-Erasmus ta indica cu Aruba ta bay tin e ‘Operation Command Center ‘mas moderno den region y mihor ekipa. Como ehempel, lo tin software cu ta consisti di inteligencia artificial. Esaki ta haci e trabou pa resolve casonan mucho mas eficiente y eficaz. Alabes e ta facilita e tareanan di e polisnan riba caya , door di por guia nan y duna nan informacion.

Como sifuera poco, e software por distingui y selecta riba color di vehiculo, number di auto, areanan specifico, color di paña, entre otro, a bisa.

Cu e ‘Operation Command  Center’ aki lo logra combati criminalidad mas eficiente.

Ta importante pa menciona tambe cu den medio di comunicacion internacional The Telegraph UK, a sali publica cu Aruba ta e isla mas sigur den Caribe y esaki no a bin di mes.

Esaki ta resultado di bon vision y strategia pa haci Aruba sigur, y pa mantene Aruba sigur.

Cuerpo Policial di Aruba y Minister di Husticia di Aruba a bin ta haciendo un tremendo trabou pa cu esaki, asina Parlamentario Guedez-Eramus a declara.