Reunionnan cu stakeholders lo sigui e siman aki

ORANJESTAD (AAN): Desde cu Diabierna dos siman pasa, Prome Minister Señora Evelyn Wever-Croes a worde nombra como Formador di e gobierno nobo, mesora e trabaonan pa yega na formacion di Gabinete Wever-Croes II a cuminsa.

   E proceso pa yega na un gobierno stabil ta worde parti den 4 diferente aspecto, y esakinan ta:

(1) Acuerdo di gobernacion entre Partidonan MEP y RAIZ.

(2) Reparticion di e carteranan.

(3) Apunta Ministernan y screening.

(4) Reunionnan cu Stakeholders.

   Diabierna 16 di juli a cuminsa cu e aspecto di formacion number 4, reunionnan cu Stakeholders den comunidad; cu gremionan comercial, gremionan sindical, cu representantenan di area social, salubridad, area di naturaleza y desaroyo economico, pa scucha wak kico nan ta haya ta importante pa e gobierno nobo tene cuenta cu ne den e siguiente gobernacion pa e proximo 4 añanan.

   E prome area riba schedule tabata Salubridad. Cada reunion a dura 45 minuut. Despues di cada reunion e representante di cada area a duna un declaracion y prensa por a haci pregunta of duna remarke.

   Pa e area aki, a duna declaracion e.o. ing. Edwin Jacobs, (SVb/AZV), Dr. Vroegop, (Dr. Horacio Oduber Hospital), Señora Van den Oever (Asociacion ASHA), Dr Raijnherc (ImSan), Dr. van Gaalen (Respaldo), Dr. van Trigt (HAVA), y Gina Maduro (Sindicato ABV).

   “E reunionnan a bay bon. E proceso pa forma e siguiente gobierno ta hopi serio y importante y mester tuma su tempo. Como formador, mi ta reuniendo desde awe cu diferente stakeholders den nos comunidad y ta gradici cada un cu a honra nos invitacion y sinta cu mi den e etapa importante aki di formacion di e miho gobierno cu Aruba por tin den e temponan aki”, Prome Minister Evelyn Wever-Croes a duna di conoce.

   E reunionnan ta continua den e dianan nos dilanti te ora cubri cu tur e areanan ariba menciona.

   E potretnan ta mustra e reunionnan cu tabatin siman pasa cu esnan di Cuido Medico.