ORANJESTAD (AAN) –Prome Minister Demisionario y alavez Formador di Gobierno nobo, Evelyn Wever-Croes, a yama un conferencia di prensa pa duna prensa informacion, tocante su reunionnan cu e stakeholders den e area di salubridad.
E dignatario a splica cu e reunionnan ta den “full swing”, indicando con e procesonan aki ta tuma lugar. E ta distingui cuater diferente proceso banda di otro.
E prome ta cu e partidonan MEP y RAIZ hunto, tin cu yega na un acuerdo di gobernacion den lineanan grandi: con ta bay goberna.
“Nos ta trahando riba dje y den e proximo dianan nos ta sigui delibera riba esaki pa asina cu nos keda cla den e proximo siman, nos por bisa mas di dje”, den su calidad di Formador, e mandatario a bisa.
El a menciona como e di dos parti, e reparticion di e ministerionan entre Partido MEP y Partido Raiz.
“Cual partido ta haya cual ministerio; esaki nos no ta asina leu ainda, nos mester di tempo pa hacie, y e ta depende hopi tambe di e prome punto cu mi a bisa di e acuerdo. Kico cada ken di nos kier logra, den e siguiente gobierno” e dama a subraya.
E di tres punto ta cu un bez cu nan yega na un reparticion di e cuater ministerionan cu MEP ta haya y cuater ministerionan cu RAIZ ta haya e ora ey nan ta bay propone candidatonan pa bira minister, unda tambe e procedure di screening ta bay cuminza. Akinan no a yega mes, tampoco, segun e dignatario a expresa.
E di cuater aspecto cu tambe ta hopi importante, y ta cana manera un linea cora, den henter e proceso, ta e reunionnan cu e gremionan of stakeholders.
“Awe, nos a cuminza cu e reunionnan aki y nos a scoge e tema di salud. Nos no por reuni cu tur e stakeholders den e periodo cortico aki, pero e compromiso tey si, cu un bez cu e minister nobo ta apunta e si lo reuni cu tur e stakeholders” e mandatario a señala.
El a agrega cu Diabierna nan a cuminza cu e area di salud, y nan tabata tin un dia maratonico desde 1 or di merdia. “Nos a haya informacion di SVb riba nos fondo di seguro social y e impacto negativo cu Covid-19 tabata tin riba e fondo. Nan a pidi hopi atencion pa e tema aki, combina cu e hecho cu nos tin problema di vergrijzing na Aruba. No a papia tambe di e fondo di AZV y e retonan cu e ta enfrenta, y kico ta e sugerencianan cu ta bin padilanti pa nos por fortifica e fondo aki”, e mandatario a subraya.
Wever-Croes a agrega cu tambe el a papia cu funcionarionan di Dr. Horacio Oduber Hospital (HOH), pa por compronde con su situacion financiero ta pero tambe otro retonan cu tin na HOH. Tambe a combersa cu IMSAN, cu tambe a pone nos na haltura di kico tur ta sosodiendo, y kico ta e retonan mas grandi”, Formador Evelyn Wever-Croes a declara.
