ORANJESTAD (AAN): E recorte di fondonan den sector di cuido medico tambe a afecta Instituto Medico San Nicolas (ImSan). Asina Dr. Joel Rajnherc, director di e instituto a bisa prensa despues di a reuni cu Formador di Gobierno, Evelyn Wever-Croes.
El a indica cu no mester lubida cu nan edificio ta nobo, ekiponan ta nobo y e prome aña ta bay facil pasobra tur cos ta cay bao di garantia. Pero e di dos aña tin cu haci e mantencion di tur e ekiponan aki cual ta hopi caro.
Ora di pone esey den un presupuesto real na AZV pa 2021 y pa cualkier motibo por wordo corta cu 5.5 %, e ta bay afecta e mantencion di e ekiponan pasobra no a conta riba e hecho cu no ta haya placa, a remarca.
Ta yegando e hecho cu tin cu scoge entre duna e pashent cuido cu un aparato cu no ta manteni of ta bay mantene e mashin y no tin placa pa duna e cuido, Dr. Rajnherc a señala. Esey no ta un 'fair choice' y esey ta algo cu ta notando cu ta afectando e cantidad y e calidad di e cuido cu por brinda, a agrega.
No ta realistico cu den un tempo masha cortico ta bisa cu ta zorg cu henter cuido 60 miyon florin pa aña menos, riba un presupuesto di 420 miyon ta rond di 15 %. No por haci esaki den un dos por tres. Mester hacie gradualmente y haya e chens pa busca e manera corecto, a remarca.
"Mi ta sigur cu nos ta logra pasobra mi ta sigur cu tin gastonan cu no ta eficiente, cu nos por haci mihor. Pero mester tin tempo pa yega eynan. Vooral ora bo a sali foi nada y bira un instituto asina grandi, den un tempo asina chikito", a Rajnherc expresa.
Den un tempo di 2 pa 3 aña a sali for di un cantidad di 150 empleado pa 261. Por mehora e gastonan y con pa maneh'e, pero mester haya chens pa wak unda e buraconan ta, e director di ImSan a splica.
